இணைக்க வேண்டும்

@
அத்திக்கடவு-அவிநாசி நீர் செறிவூட்டும் திட்டம் அ.தி.மு.க., ஆட்சியில் கொண்டு வரப்பட்டது. தி.மு.க., அரசு பணியை நிறைவு செய்து துவக்கி வைத்திருக்கிறது. இதன் வாயிலாக வானம் பார்த்த பூமிகள் செழிக்கும். இத்திட்டத்தில் அடுத்தபடியாக விடுபட்ட குளம், குட்டைகளை இணைக்க வேண்டும்.

திட்டம் -2 வரைவு

இத்திட்டத்தை 2020ல் துவங்கிய அ.தி.மு.க.,வுக்கு நன்றி. திட்டம் கொண்டு வர போராடி, உயிரிழந்தவர்களுக்கு இத்திட்டம் சமர்ப்பணம். நாங்கள் 15 ஆண்டுகளாக போராடி வந்தோம். திட்டத்தில் விடுபட்ட பகுதிகளை இணைத்து, 'திட்டம்-2'க்கான வரைவை முதல்வரிடம் வழங்கியுள்ளோம். அதை நிறைவேற்றும்போது முழுமையான பலன் கிடைக்கும்.

ஈஸ்வரன்கொ.ம.தே., கட்சி

பாண்டியாறு புன்னம்புழா திட்டம் காலத்தின் கட்டாயம்

தமிழ்நாடு விவசாய சங்கங்களின் கூட்டமைப்பு செயலர் நல்லசாமி கூறியதாவது:இத்திட்டத்தின் கீழ், ஆண்டுக்கு, 70 நாட்கள் தவிர, மற்ற நாட்களில், அனைத்து உபகரணங்களும் பயன்பாடின்றி இருக்கும். ஆண்டு முழுக்க இத்திட்டத்தை செயல்படுத்த, கேரள அரசுடன் பேசி, பாண்டியாறு - புன்னம்புழா திட்டத்தை செயல்படுத்த வேண்டும்.நீலகிரி மாவட்டம், கூடலுார் அருகே உருவாகும் பாண்டியாறு, கேரளாவின் சாலியாற்றில் கலந்து, நிலம்பூர், கள்ளிக்கோட்டை வழியாக கடலில் கலக்கிறது. இதன் வாயிலாக ஆண்டுக்கு, 14 டி.எம்.சி., நீர் கிடைக்கும். நீர் உற்பத்தியாகும் இடத்தில் சிறிய சுரங்கம் அமைத்து, தடுப்பணை கட்டினால், அந்நீரை, நீலகிரி மாவட்டம், மாயாற்றுக்கு திருப்ப முடியும். பெரியளவில் செலவிட அவசியம் இல்லை. கேரளாவில் ஆண்டு சராசரி மழையளவு, 300 செ.மீ., தமிழகத்தின் மழையளவு சராசரியாக ஆண்டுக்கு, 92 செ.மீ., எனவே, பாண்டியாறு - புன்னம்புழா திட்டத்தை நிறைவேற்றினால், தமிழகத்தின் நீர்த்தேவை பெருமளவு பூர்த்தியாகும். இதன் வாயிலாக, 14 டி.எம்.சி., நீர் கூடுதலாக கிடைக்கும் பட்சத்தில், அத்திக்கடவு திட்டத்துக்கு, 1.50 டி.எம்.சி., தண்ணீர் போக, எஞ்சிய தண்ணீரை வைத்து, திருப்பூர், கோவை மாவட்டங்களுக்கு கூடுதலாக குடிநீர் தேவையை தீர்க்க முடியும். பவானிசாகர் அணை சார்ந்த பாசன பற்றாக்குறையும் தவிர்க்கப்படும்.அங்கிருந்து காவிரியில் வடிந்து, டெல்டா மாவட்ட பாசனத்துக்கும் பயன்படுத்த முடியும். ஒரு பகுதி நீரை வீராணம் ஏரிக்கு கொண்டு சென்று, சென்னை மக்களின் குடிநீர் தேவையையும் பூர்த்தி செய்ய முடியும்.

நீலகிரி மழையே பிரதானம்

துவக்கத்தில், பில்லுார் அணையில் இருந்து, 4 கி.மீ., நீளத்துக்கு சுரங்கம் தோண்டி, 100 கி.மீ. நீளத்துக்கு திறந்தவெளி கால்வாய் அமைத்து, அதன் வழியாக, பெருந்துறை வரை, 538 குளம், குட்டைகளில் நீர் நிரப்ப திட்டமிடப்பட்டது. இது, மேற்கு தொடர்ச்சி மலை சார்ந்த பகுதி என்பதால், சுரங்கம் அமைக்க சுற்றுச்சூழல் அனுமதி கிடைக்காது. அத்துடன், பவானி அணையில் இருந்து வெளியேறும் உபரிநீரை மட்டும் தான் எடுக்க வேண்டும் என, நிர்பந்தம் இருந்தது.பில்லுார், பவானி அணைகள் ஒரே நேரத்தில் நிரம்பினால் தான் உபரி நீர் வெளியேறும் என்ற நிலையில், இது 5 -- 8 ஆண்டு இடைவெளியில் தான் அவ்வாறு கிடைக்கும் என, நீர்வள ஆதார அமைப்பினர் கணித்தனர். மேலும், பவானியில் இருந்து வெளியேறும் நீரை நேரடியாக எடுத்தால், அந்த அணை சார்ந்துள்ள, கீழ் பவானி, கொடிவேரி, காலிங்கராயன் பாசன விவசாயிகளுக்கு பாதிப்பு ஏற்படும் என்ற புகார் எழுந்தது. இதுபோன்ற காரணங்களால் அத்திட்டம் கைவிடப்பட்டது.மேட்டுப்பாளையம் பவானி ஆற்றில் இருந்து, காலிங்கராயன் அணைக்கட்டு தாண்டி வெளியேறும் உபரி நீர் காவிரியில் கலக்கிறது. அவ்வாறு, வெளியேறும் உபரிநீர் காவிரியில் டெல்டா விவசாயிகளின் பாசனத்துக்கு பயன்படுகிறது என்ற நிலையில், அதற்கும் இடையூறு ஏற்படுத்தக் கூடாது என, உபரி நீரில், ஆண்டுக்கு, 1.5 டி.எம்.சி., மட்டுமே எடுக்க முடிவானது.காலிங்கராயன் அணைக்கட்டுக்கு கீழ், ஒரு மீட்டர் உயரத்தில் தடுப்பணை அமைக்கப்பட்டுள்ளது. அதில் தேங்கும் உபரி நீர், முதல் நீரேற்று நிலையத்துக்கு 'பம்பிங்' செய்யப்படும். அங்கிருந்து, பிற ஐந்து நீரேற்று நிலையங்களுக்கும், 'பம்பிங்' செய்யப்படும். ஆறு நீரேற்று நிலையங்களில் அமைக்கப்பட்டுள்ள நீர்தேக்க தொட்டியில் அந்த தண்ணீர் தேக்கி வைக்கப்பட்டு, தேர்ந்தெடுக்கப்பட்ட குளம், குட்டைகளுக்கு 'சென்சார்' முறையில் திறந்து விடப்படும் வகையில் திட்டம் வடிவமைக்கப்பட்டுள்ளது.மொத்தம், 1,916 கோடி ரூபாய் மதிப்பில் முழுமை பெற்றுள்ள இத்திட்டம், நீலகிரி மாவட்டத்தில் பெய்யும் மழை மற்றும் பெருக்கெடுத்து பவானி ஆற்றுக்கு வரும் மழை நீரை நம்பியே உள்ளது.