மத்திய கல்வி அமைச்சகத்தின், தேசிய கல்வி நிறுவனங்களுக்கான தர வரிசை அமைப்பான என்.ஐ.ஆர்.எப்., சார்பில், ஒவ்வொரு ஆண்டும் கல்வி நிறுவனங்களின் தர வரிசை பட்டியல் வெளியிடப்படுகிறது. அதுபோல, மாநில அளவில் கல்வி நிறுவனங்களின் தர வரிசை பட்டியல் தயாரித்து வெளியிட, தமிழக உயர் கல்வித்துறை திட்டமிட்டு உள்ளது.

முதற்கட்டமாக, மாநிலம் முழுதும் உள்ள கல்லுாரிகளின் தர வரிசை பட்டியலை எவ்வாறு தயார் செய்வது என்பது தொடர்பான வரைவு அறிக்கையை, மாநில உயர் கல்வி மன்றம் வெளியிட்டு உள்ளது.

இந்த வரைவு அறிக்கையில், பல்கலை, தன்னாட்சி பெற்ற, தன்னாட்சி பெறாத கல்லுாரி என, மூன்று பிரிவுகளாக கல்லுாரிகள் பிரிக்கப்பட்டுள்ளன. ஒவ்வொரு பிரிவிலும், மாணவர்களின் கற்றல் திறன், உள்கட்டமைப்பு, ஆராய்ச்சி, மாணவர்களுக்கான உதவி, சமூக நீதி என, ஏழு வகை தலைப்புகளில் தலா 700 மதிப்பெண்கள் வழங்கப்பட்டு உள்ளன.

இந்த வரைவு அறிக்கை தொடர்பான கருத்து கேட்பு கூட்டம், சென்னை பல்கலையில் நேற்று நடந்தது.

மாநில உயர் கல்வி மன்ற துணை தலைவர் விஜயகுமார் தலைமையில் நடந்த கூட்டத்தில், சென்னை பல்கலையின் கீழ் இயங்கும், 138 கல்லுாரிகளைச் சேர்ந்த பேராசிரியர்கள், 27 குழுக்களாக பங்கேற்று, வரைவு அறிக்கை தொடர்பாக தங்கள் கருத்துகளை தெரிவித்தனர்.

அடுத்ததாக, தமிழகத்தின் மற்ற 12 பல்கலைகளிலும், இது போன்ற கருத்துகேட்பு கூட்டங்கள் நடத்தப்பட இருப்பதாக, மாநில உயர் கல்வி மன்ற துணை தலைவர் விஜய குமார் தெரிவித்து உள்ளார்.