உணவுப் பொருட்களை பதப்படுத்தி, பொட்டலமிட்டு விற்பனை செய்வது தொடர்ந்து அதிகரித்து வருகிறது. உரிமம் பெற்ற பெரு நிறுவனங்கள் முதல், சிறிய வகையில் உணவுத் தொழிலில் ஈடுபடுவோர் வரை, உணவு பொருட்களை பொட்டலமிட்டு, விற்பனை செய்கின்றனர். அவ்வாறு பொட்டலமிடப்படும் உணவுப் பொருட்களில், உற்பத்தி தேதி, காலாவதியாகும் தேதி ஆகியவற்றை பார்த்து, நுகர்வோர் பொருட்களை வாங்குகின்றனர்.

அதே நேரம், பொட்டலமிடப்பட்ட உணவுப் பொருட்களில், சைவ -- அசைவ குறியீடு கட்டாயம் இடம் பெற்றிருக்க வேண்டும் என, தமிழ்நாடு உணவு பாதுகாப்பு துறை உத்தரவிட்டுள்ளது. பொதுமக்களும், பொட்டலமிடப்பட்ட உணவுப் பொருட்களில் இடம் பெற்ற தகவல்களை தெரிந்து, பொருட்களை வாங்க வேண்டும் என, உணவு பாதுகாப்பு துறை அறிவுறுத்தி உள்ளது.

இதுகுறித்து, உணவு பாதுகாப்பு துறை அதிகாரிகள் கூறியதாவது: பொட்டலமிடப்பட்ட உணவுப் பொருட்களில், பதப்படுத்துதல் முதல் 12 வகையான தகவல்கள் இடம் பெற்றிருக்கும். தயாரிப்பு நிறுவனத்தின் உரிமம் மற்றும் பதிவு எண், உணவின் பெயர், உற்பத்தியாளர் பெயர், முழு முகவரி, தயாரித்த தேதி, நிகர எடை, காலாவதி தேதி ஆகியவை, இடம் பெற்றிருக்கும்.

அதேபோல், ஊட்டச்சத்து விபரம், உணவு சேர்க்கைகளின் அறிவிப்பு மற்றும் அளவு, எங்கிருந்து இறக்குமதி செய்யப்பட்டது, உணவுப் பொருட்கள் கோடு மற்றும் 'பேட்ச்' எண், நுகர்வோர் தொடர்பு கொள்ளக்கூடிய தொலைபேசி எண், ஆகியவை இருக்க வேண்டும். அதேபோல், சைவ மற்றும் அசைவ குறியீடு, கட்டாயம் இடம் பெற்றிருக்க வேண்டும்.

சைவ உணவுப் பொருளாக இருந்தால், 'பச்சை' வண்ணத்தில் குறியீடு இருக்கும். அதேபோல், அசைவ உணவுப் பொருளாக இருந்தால், 'சிவப்பு' வண்ணத்தில் குறியீடு இடம்பெற்று இருக்கும். அதன்படி, பொட்டலமிடப்பட்ட உணவுப் பொருட்களில், இது போன்ற தகவல்களை பார்த்து தெரிந்து, வாங்கி சாப்பிட வேண்டும்.

சைவம் சாப்பிடுவோரும், இது போன்ற குறியீடு தெரியாமல், சில நேரங்களில், அசைவம் கலந்த உணவுப் பொருட்களை சாப்பிடுகின்றனர். அவர்களுக்கு தெரிவிக்கும் வகையில், இந்த குறியீடு அனைவரும் தெரிந்து கொள்வது அவசியம். இவ்வாறு அவர்கள் கூறினர்.