சட்டசபையில் நேற்று, மீன்வளத்துறை மானிய கோரிக்கை மீதான விவாதத்திற்கு பதிலளித்து, அவர் வெளியிட்டுள்ள அறிவிப்புகள்:

* காலநிலை மாற்றத்தை எதிர்கொள்ளும் வகையில், 16 கடலோர மீனவ கிராமங்கள், 32 கோடி ரூபாயில் மேம்படுத்தப்படும். இக்கிராமங்களில், மீன் இறங்குதளம், வலைபின்னும் கூடம், சூரிய ஒளி மீன் உலர்த்தி என, மீனவர்களுக்கான மற்ற வாழ்வாதார திட்டங்கள் செயல்படுத்தப்படும்

* மீனவ மகளிருக்கு நுண்கடன் வழங்க, 25 கோடி ரூபாய் மூலதனத்தில், 'அலைகள்' திட்டம், தமிழ்நாடு மாநில தலைமை மீன்வள

கூட்டுறவு இணையம் வழியாக செயல்படுத்தப்படும்

* மயிலாடுதுறை மாவட்டம் தரங்கம்பாடி; கன்னியாகுமரி மாவட்டம் தேங்காப்பட்டணம் மற்றும் துாத்துக்குடி மீன்பிடி துறைமுகங்கள், 45 கோடி ரூபாயில், பசுமை மீன்பிடி துறைமுகங்களாக மேம்படுத்தப்படும்

* நாட்டின மீன் இனங்களை பெருக்கி பாதுகாக்க, 1.20 கோடி ரூபாய் செலவில், ஆறுகளில் மீன் குஞ்சுகள் இருப்பு செய்யப்படும்

* தரமான மீன் மற்றும் மீன் உணவு பொருட்கள், நுகர்வோருக்கு நியாயமான விலையில் கிடைக்க, தமிழ்நாடு மீன் வளர்ச்சி கழகம் சார்பில், 'கயல்' திட்டம் துவக்கப்படும். இத்திட்டத்தின் கீழ், தேவைப்படும் இடங்களில், புதிய சில்லரை மீன் விற்பனை நிலையங்கள் உருவாக்கப்படும்

* பாரம்பரிய நாட்டுப்படகு மீனவர்கள் இயந்திரங்கள் வாங்க, 10.80 கோடி ரூபாய் மானியமாக வழங்கப்படும்

* திருவள்ளூர் மாவட்டம், அவுரிவாக்கம், கீழ்குப்பம் மற்றும் வல்லம்பேடுகுப்பம் கிராமங்களில், புதிய மீன் இறங்கு தளங்கள், 9 கோடி ரூபாயில் அமைக்கப்படும்

* ஆழ்கடல் மீன்பிடிப்பில் ஈடுபடும் படகுகளுக்கு, 200 செயற்கைக்கோள் தொலைபேசிகள் வாங்க, 80 லட்சம் ரூபாய் மானியமாக வழங்கப்படும்

* கடலுார் மாவட்டம் புதுக்குப்பம் மீனவ கிராமத்தில், 11 கோடி ரூபாயில், மேம்படுத்தப்பட்ட மீன் இறங்குதளம் அமைக்கப்படும்

* மீன்கள், மீன் உணவுப் பொருட்கள் இருப்பு, விலை, சந்தை நிலவரம் அறிய, 'இ - மீன்' வலைதள சேவை, 50 லட்சம் ரூபாயில் உருவாக்கப்படும்

* தீவிர மீன் வளர்ப்பு முறையில், நீர்த்தேக்கங்களில் மிதவை கூண்டுகள் அமைத்து, மீன் உற்பத்தியை அதிகரிக்கும் திட்டம், 7.70 கோடி ரூபாயில் செயல்படுத்தப்படும்

* அலங்கார மீன் உற்பத்தியாளர் மற்றும் விற்பனையாளர் கூட்டுறவு சங்கங்கள் அமைக்கப்படும். அனைத்து மாவட்டங்களிலும், மீன்வள கண்காட்சிகள், 74 லட்சம் ரூபாய் செலவில் நடத்தப்படும்

* நாகப்பட்டினம், துாத்துக்குடி, திருநெல்வேலி, கன்னியாகுமரி மாவட்டங்களில், 200 நாட்டுப்படகு மீனவர்களுக்கு கணவாய் மீன்பிடி உபகரணங்கள் வாங்க, 40 லட்சம்ரூபாய் மானியம்வழங்கப்படும்

* நாகப்பட்டினம் மாவட்டம், வேளாங்கண்ணி கிராமத்தில், கடல் அரிப்பு தடுப்பு பணிகள், 18 கோடி ரூபாய் செலவில் மேற்கொள்ளப்படும்

* செங்கல்பட்டு மாவட்டம், சதுரங்கப்பட்டினம், துாத்துக்குடி மாவட்டம் ஆலந்தலை, அண்ணா காலனி, திருநெல்வேலி மாவட்டம், பெருமணல் மீனவ கிராமங்களில், மேம்படுத்தப்பட்ட மீன் இறங்கு தளங்கள் அமைக்கப்படும்

* சென்னை, ராமநாதபுரம், துாத்துக்குடி மாவட்டத்தில், 45 லட்சம் ரூபாய் செலவில், மீன் கழிவு மறு சுழற்சி ஆலைகள் அமைக்கப்படும்

* மீன் விற்பனையாளர்கள் கூட்டுறவு சங்கங்கள் உருவாக்கப்படும்

* தமிழகத்தில் வளர்க்கப்படும் மீன் வகைகளில், ஒரு மீன் வகையை, மாநில மீனாக அடையாளம் கண்டு, அதன் உற்பத்தி மற்றும் மேம்பாட்டிற்கானதிட்டம், 50 லட்சம் ரூபாயில் செயல்படுத்தப்படும்

* பாகு மீன் மற்றும் கொடுவா மீன் குஞ்சு உற்பத்தி மையங்கள், கிருஷ்ணகிரி மற்றும் ராமநாதபுரம் மாவட்டத்தில், 4 கோடி ரூபாய் செலவில் அமைக்கப்படும்

* சென்னை, செங்கல்பட்டு, விழுப்புரம், கடலுார், மயிலாடுதுறை, நாகப்பட்டினம், ராமநாதபுரம், திருநெல்வேலி, கன்னியாகுமரி மாவட்ட கடலோர மீனவ கிராமங்களில், 5 கோடி ரூபாயில் சுழல் நிதி உருவாக்கப்படும். இவ்வாறு அவர்அறிவித்தார்.