ஆவினில், 6 சதவீதம் கொழுப்பு சத்துள்ள, ஆரஞ்ச் நிற பால் பாக்கெட் 500 மி.லி., 30 ரூபாய்க்கும், 4.5 சதவீதம் கொழுப்பு சத்துள்ள பச்சை நிற பால் பாக்கெட், 22 ரூபாய்க்கும், 3 சதவீதம் கொழுப்பு சத்துள்ள நீல நிற பால் பாக்கெட், 20 ரூபாய்க்கும் விற்கப்படுகிறது.

இதேபோல, 3.5 சதவீதம் கொழுப்பு சத்துள்ள ஊதா நிற பால் பாக்கெட்டில், வைட்டமின் ஏ மற்றும் டி சேர்த்து, 22 ரூபாய்க்கு விற்கப்படுகிறது. அதிக கொழுப்பு சத்துள்ள பச்சை நிற பால் பாக்கெட், 22 ரூபாய்க்கு கிடைப்பதால் பலரும் விரும்பி வாங்குகின்றனர்.

தி.மு.க., தேர்தல் வாக்குறுதிபடி, பச்சை நிற பால் பாக்கெட்டுகள் குறைத்து விற்கப்படுவதால், ஆவினுக்கு லிட்டருக்கு, 12 ரூபாய் வரை நஷ்டம் ஏற்படுகிறது. அதன் உற்பத்தியை நிறுத்த, இரண்டு முறை முயற்சி மேற்கொள்ளப்பட்டது. நுகர்வோர்கள், அரசியல் கட்சியினர் எதிர்ப்பால் திட்டம் கைவிடப்பட்டது. அதற்கு பதிலாக, பச்சை நிற பால் பாக்கெட் உற்பத்தி, 80 சதவீதம் குறைக்கப்பட்டு உள்ளது.

இந்நிலையில், நுகர்வோரை நுாதனமாக ஏமாற்றும் வகையில், ஊதா நிற பால் பாக்கெட்டை பச்சை நிறமாக மாற்றி, 'கிரீன் பிளஸ் மேஜிக்' என்ற பெயரில் விற்பனை செய்ய, ஆவின் முடிவு செய்துள்ளதாக புகார் எழுந்துள்ளது.

இதுகுறித்து, ஆவின் நிர்வாக இயக்குனர் வினீத் நேற்று வெளியிட்டுள்ள அறிவிப்பு: ஆவினில் நாள்தோறும், 31 லட்சம் லிட்டர் பால் மற்றும் மாதம்தோறும், 50 கோடி ரூபாய் மதிப்பிலான பால் பொருட்கள் விற்பனை செய்யப்படுகின்றன. பொது மக்களின் தேவையை பூர்த்தி செய்யும் வகையில், ஆவின் வாயிலாக பல்வேறு புதிய பால் மற்றும் பால் பொருட்கள் அறிமுகம் செய்யப்பட்டு வருகின்றன.

அதன்படி, பொது மக்களின் விருப்பம் மற்றும் ஆரோக்கியத்திற்கு ஏற்ற வகையில், 'வைட்டமின் ஏ மற்றும் டி' செறிவூட்டப்பட்ட கிரீன் மேஜிக் பிளஸ் புதிய பால் பாக்கெட் அறிமுகம் செய்யப்பட உள்ளது. காஞ்சிபுரம் - திருவள்ளூர், கோவை, சேலம் பால் கூட்டுறவு சங்கங்கள் வாயிலாக, 18ம் தேதி முதல் விற்பனை செய்யப்படவுள்ளது.

இவ்வாறு அவர் கூறியுள்ளார்.

ஆவினில், வெள்ளை மற்றும் பழுப்பு நிற பாக்கெட்டில், 500 கிராம் தயிர், 35 ரூபாய்க்கு விற்பனை செய்யப்பட்டு வந்தது. தற்போது, குறைந்த கொழுப்பு மற்றும் அதிக புரதம் கொண்ட தயிர், 'ஆவின் லைட்' என்ற பெயரில், வெள்ளை மற்றும் மஞ்சள் நிற பாக்கெட்டில் அறிமுகம் செய்யப்பட்டு உள்ளது.

அதன்படி, 120 கிராம் தயிர் 10 ரூபாய், 250 கிராம் தயிர் 20 ரூபாய், 450 கிராம் தயிர் 35 ரூபாய் என, விலை நிர்ணயம் செய்யப்பட்டு உள்ளது. முன்னர் விற்பனை செய்ததை விட, 50 கிராம் எடை குறைத்து, 35 ரூபாய்க்கு தயிர் விற்பனை செய்யப்பட உள்ளது. இந்த மறைமுக விலை ஏற்றம், நுகர்வோர் மத்தியில் அதிருப்தியை ஏற்படுத்தியுள்ளது.