அமெரிக்காவில், 30 லட்சத்துக்கும் அதிகமான ஹிந்து சமூகத்தினர் வசிக்கின்றனர். பலர் அந்நாட்டு செனட்டிலும் உறுப்பினர்களாக உள்ளனர். இங்கு, அனைத்து ஹிந்து பண்டிகைகளும் விமரிசையாக கொண்டாடப்படுகின்றன.

நவராத்திரி மற்றும் தீபாவளி பண்டிகை காலமான, அக்டோபர் மாதத்தை ஹிந்து பாரம்பரிய மாதமாக அங்கீகாரம் செய்வதற்கான இயக்கத்தை, ஹிந்து அமெரிக்க அறக்கட்டளை முன்னெடுத்து வருகிறது. ஜார்ஜியா மாகாண கவர்னர், அக்டோபரை ஹிந்து பாரம்பரிய மாதமாக கடந்த ஆண்டு அறிவித்தார்.

இந்நிலையில், ஒஹியோ மாகாணத்தின் இந்திய வம்சாவளியைச் சேர்ந்த முதல் ஹிந்து செனட்டர் நீரஜ், தன் மாகாணத்திலும் ஹிந்து பாரம்பரிய மாதத்துக்கு ஒப்புதல் பெறும் நடவடிக்கையை ஹிந்து அமைப்பினருடன் சேர்ந்து மேற்கொண்டார்.

அதன்படி, ஒஹியோ மாகாண சபையில் அக்டோபர் மாதத்தை ஹிந்து பாரம்பரிய மாதமாக அறிவிக்கும் சட்ட மசோதா நேற்று அறிமுகப்படுத்தப்பட்டு, அதற்கு ஒப்புதலும் பெறப்பட்டது. இதன்பின் ஹிந்து மதத்தின் பாரம்பரியம், கலாசாரம் மற்றும் ஆன்மிக மரபுகளை விளக்கும் கொண்டாட்டங்கள் அரசு சார்பில் அக்டோபரில் நடத்தப்படும்.