மத்திய ஆசிய நாடான கிர்கிஸ்தானில் அதிபர் சதீர் ஜபரோவின் அதிகாரத்தை உறுதிப்படுத்தும் வகையில், பார்லிமென்டுக்கு முன்கூட்டியே தேர்தல் அறிவிக்கப்பட்டது. அடுத்தாண்டு நவம்பரில் பார்லிமென்ட் தேர்தல் நடைபெற இருந்த நிலையில், கடந்த செப்டம்பரில் பார்லிமென்ட் கலைக்கப்பட்டது. வரும், 2027ல் அதிபர் தேர்தல் நடைபெற உள்ளதால், இரு தேர்தலும் ஒன்றாக வருவதை தவிர்க்க, தற்போது முன்கூட்டியே தேர்தல் நடத்தப்பட்டதாக கூறப்படுகிறது.

பார்லிமென்ட்டுக்காக நடத்தப்பட்ட இத்தேர்தலில், குறிப்பிடத்தக்க எதிர்க்கட்சிகள் எதுவும் போட்டியிடவில்லை. இதற்கு காரணம், தற்போதைய அரசால் நடைமுறைப்படுத்தப்பட்ட சட்டமே ஆகும். தேர்தல் நடப்பதற்கு முந்தைய வாரங்களில் எதிர்க்கட்சி தலைவர்கள் மற்றும் பத்திரிகையாளர்கள், சதித்திட்டம், பொது அமைதிக்கு குந்தகம் விளைவித்தல் போன்ற குற்றச்சாட்டுகளின் கீழ் கைது செய்யப்பட்டனர். குறைந்தது 10 எதிர்க்கட்சி தலைவர்கள் இவ்வாறு தேர்தலில் போட்டியிடாத வகையில் தடுத்து வைக்கப்பட்டனர் என கூறப்படுகிறது.

கடந்த 2021ல் நடந்த அரசியலமைப்பு சீர்திருத்த வாக்கெடுப்பு, பார்லிமென்ட் முறையில் இருந்து நாட்டை மீண்டும் ஒரு வலுவான அதிபர் முறைக்கு மாற்றியது. இதனால், பார்லிமென்டின் அதிகாரம் வெகுவாக குறைக்கப்பட்டது.