கோலாலம்பூர்: 'இந்தியாவின் ஐ.ஐ.டி., போன்ற உயர்கல்வி நிறுவனங்களில், மலேசியா வாழ் இந்தியர்களுக்கு அதிகளவில் இடம் ஒதுக்க வேண்டும்' என, மலேசிய இந்திய காங்கிரஸ் கோரிக்கை விடுத்துள்ளது. மலேசியாவில் தற்போது, 20 லட்சம் இந்தியர்கள் வசிக்கின்றனர். ஒட்டு மொத்த மக்கள் தொகையில் 7.8 சதவீதம் உள்ள இந்தியர்கள் சார்பில், மலேசிய இந்திய காங்கிரஸ் கட்சி செயல்பட்டு வருகிறது. இந்நிலையில், மலேசிய தலைநகர் கோலாலம்பூரில் நேற்று பேட்டியளித்த அக்கட்சித் தலைவர் ஜி.பழனிவேல் கூறியதாவது: இந்திரா மற்றும் எம்.ஜி.ஆர்., ஆட்சிக் காலங்களில், இந்தியாவின் ஐ.ஐ.டி., எய்ம்ஸ் போன்ற உயர்கல்வி நிறுவனங்களில் படிக்க, மலேசிய இந்தியர்களுக்கு கணிசமான இடங்கள் ஒதுக்கப்பட்டன. ஆனால் தற்போது, அந்த இடங்கள் மிகவும் குறைக்கப்பட்டு விட்டன.