கிழக்கு ஐரோப்பிய நாடான உக்ரைன் மீது 2022 பிப்ரவரியில் ரஷ்யா போர் தொடுத்தது. மூன்று ஆண்டுகளுக்கு மேலாக நீடிக்கும் சண்டையை முடிவுக்கு கொண்டு வர, அமெரிக்கா மற்றும் ஐரோப்பிய நாடுகள் முயன்று வருகின்றன.

அழைப்பு இந்த முயற்சியின் ஒரு பகுதியாக ரஷ்ய அதிபர் விளாடிமிர் புடின் - அமெரிக்க அதிபர் டொனால்டு டிரம்ப் சந்திப்பு அமெரிக்காவின் அலாஸ்காவில், கடந்த 15ல் நடந்தது. இதில் போர் நிறுத்தம், பொருளாதார தடை தளர்வு உட்பட பல முக்கிய விஷயங்கள் விவாதிக்கப்பட்டன.

ஆனால், அந்த சந்திப்பில் போர் நிறுத்த ஒப்பந்தம் உறுதி செய்யப் படவில்லை. இந்த சந்திப்பு முடிந்தவுடன் அதிபர் டிரம்ப், உக்ரைன் அதிபர் வோலோடிமிர் ஜெலன்ஸ்கியை தொலைபேசியில் தொடர்புகொண்டு விவரித்தார். அமெரிக்கா வரும்படி அழைப்பு விடுத்தார்.

அதை ஏற்று ஜெலன்ஸ்கி நேற்று முன்தினம் அமெரிக்கா சென்றார். அவருடன் சில ஐரோப்பிய நாடுகளின் த லைவர்களும் சென்றனர் .

பிரான்ஸ் அதிபர் இம்மானுவேல் மேக்ரான், பின்லாந்து அதிபர் அலெக்சாண்டர் ஸ்டப், இத்தாலி பிரதமர் ஜியோர்ஜியா மெலோனி, பிரிட்டன் பிரதமர் கெய்ர் ஸ்டாமர், ஜெர்மனி பிரதமர் பிரெட்ரிக் மெர்ஸ் சென்றனர்.

ஐரோப்பிய கமிஷன் தலைவர் உர்சுலா வான் டெர் லேயன் மற்றும் 'நேட்டோ' எனப்படும் ராணுவ ஒத்துழைப்புக்கான அமெரிக்கா மற்றும் ஐரோப்பிய நாடுகளின் கூட்டமைப்பின் பொதுச் செயலர் மார்க் ருட்டே ஆகியோரும் உடன் சென்றனர்.

பல நாடுகளின் தலைவர்கள் வெள்ளை மாளிகையில் கூடியதால், வரலாற்று முக்கியத்துவம் வாய்ந்த இந்த நிகழ்வை பதிவு செய்ய சர்வதேச ஊடகங்கள் அனைத்தும் வெள்ளை மாளிகை முன் திரண்டிருந்தன.

கவனம் அமெரிக்க அதிபர் டிரம்பிடம், உக்ரைன் அதிபர் ஜெலன்ஸ்கி, 'ஒரு உண்மையான போர் நிறுத்தத்திற்கும், புதிய பாதுகாப்பு கட்டமைப்பை உருவாக்குவதற்கும் உக்ரைன் தயாராக உள்ளது.

'ரஷ்யாவை விட உக்ரைனுக்கு அமெரிக்காவின் ஆதரவு மிகவும் தகுதியானது' என தெரிவித்ததாக கூறப்படுகிறது.

ஐரோப்பிய நாடுகளின் தலைவர்களும் இதே கருத்தை வலியுறுத்தி உள்ளனர். மேலும், ரஷ்யாவுடனும் டிரம்ப் நெருக்கம் காட்டுவதால், அந்நாட்டின் கோரிக்கைகளை பரிசீலிக்கும் போது கவனமுடன் இருக்கும்படி கேட்டுக்கொண்டதாக தகவல் வெளியாகி உள்ளது.

ஜெலன்ஸ்கியை சந்தித்த பின் அதிபர் டிரம்ப், ரஷ்ய அதிபர் புடினை தொலைபேசியில் தொடர்புகொண்டு 40 நிமிடங்கள் பேசினார்.

இது குறித்து அவர் வெளியிட்ட அறிக்கையில் கூறியுள்ளதாவது:

உக்ரைன் அதிபர் ஜெலன்ஸ்கி மற்றும் ஐரோப்பிய நாடுகளின் தலைவர்களுடன் மிகவும் சிறப்பான சந்திப்பு நடந்தது.

அதில் உக்ரைனுக்கு பாதுகாப்பு உத்தரவாதம் வழங்குவது குறித்து விவாதித்தோம். இந்த உத்தரவாதத்தை பல்வேறு ஐரோப்பிய நாடுகள், அமெரிக்காவின் ஒருங்கிணைப்புடன் நிறைவேற்றும்.

இந்த சந்திப்பு முடிந்ததும், அதிபர் புடினை அழைத்து அவருக்கும், அதிபர் ஜெலன்ஸ்கிக்கும் இடையில் சந்திப்பை ஏற்படுத்தும் பணிகளை துவக்கினேன். எந்த இடம் என்பதை தீர்மானிக்க வேண்டும்.

முத்தரப்பு கூட்டம் அவர்கள் இருவரும் சந்தித்து பேசிய பின், நானும் அவர்களுடன் பங்கேற்கும் ஒரு முத்தரப்பு கூட்டம் நடத்தப்படும்.

ரஷ்யா மற்றும் உக்ரைன் அதிபர்கள் சந்திப்புக்கான பணிகளை அமெரிக்க துணை அதிபர் ஜே.டி.வான்ஸ், வெளியுறவு அமைச்சர் மார்கோ ரூபியோ, சிறப்பு துாதர் ஸ்டீவ் விட்காப் ஒருங்கிணைக்கின்றனர்.

நான்கு ஆண்டுகளை நெருங்கும் இந்த போரை முடிவுக்கு கொண்டு வருவதற்கான சிறப்பான துவக்கம் இது.

இவ்வாறு அவர் கூறினார்.