வாஷிங்டன்: அமெரிக்காவின் சொந்தக் கொள்கையினால் இந்தியா - ரஷ்யா நாடுகளுக்கு இடையேயான உறவு வலுப்பெறுவதாக அமெரிக்க காங்கிரஸ் உறுப்பினர் சிட்னி காம்லாகர் டவ் தெரிவித்துள்ளார். ரஷ்ய அதிபர் புடின் டிசம்பர் மாதத்தின் தொடக்கத்தில் இருநாள் பயணமாக இந்தியா வந்திருந்தார். அமெரிக்காவுடன் வரி விதிப்பில் மோதல் போக்கு நிலவி வரும் நிலையில், அதிபர் புடின் - பிரதமர் மோடியின் சந்திப்பு உலக அரங்கில் உன்னிப்பாக கவனிக்கப்பட்டது. இது அமெரிக்காவுக்கு கவலையையும், அதிர்ச்சியையும் ஏற்படுத்தியுள்ளது. அமெரிக்காவின் வரிவிதிப்பு கொள்கையால் இந்தியாவுடனான உறவில் விரிசல் ஏற்பட்டுள்ளதாகவும், இந்தியா - ரஷ்யா இடையிலான உறவு வலுப்பெற்று வருவதாக, அமெரிக்க பார்லி உறுப்பினர், அதிபர் டிரம்ப்புக்கு எச்சரிக்கை விடுத்துள்ளார். வெளியுறவுக் கொள்கை தொடர்பான பார்லி விவாதத்தில் கலிபோர்னியாவை சேர்ந்த ஜனநாயக கட்சி எம்.பி., சிட்னி காம்லாகர் டவ் பேசியதாவது; பிரதமர் மோடியும், அதிபர் புடினும் ஒரே காரில் பயணிக்கும் இந்தப் புகைப்படம், இரு தலைவர்களிடையேயான ஆழமான நட்புறவை வெளிப்படுத்துகிறது. இது இந்தியாவை நம்பிக்கைக்குரிய ராஜதந்திர கூட்டாளியாக நடத்துவதில், அமெரிக்கா தோல்வியடைந்ததற்கான அடையாளமாக மாறியுள்ளது. அமெரிக்காவின் கொள்கைகளே இந்தியா மற்றும் ரஷ்யாவின் உறவுகளை மிகவும் நெருக்கமாக்குகின்றன.