அமெரிக்காவில், நவ., 5ல் அதிபர் தேர்தல் நடக்கிறது. குடியரசு கட்சி சார்பில், முன்னாள் அதிபர் டொனால்டு டிரம்ப், 78, போட்டியிடுகிறார். ஜனநாயக கட்சி சார்பில், இந்திய வம்சாவளியை சேர்ந்த கமலா ஹாரிஸ் களம் இறங்குகிறார்.

சிகாகோவில் நடந்த, ஜனநாயக கட்சி மாநாட்டில் கலந்து கொண்ட முன்னாள் அதிபர் ஒபாமா, கமலாவுக்கு ஆதரவு தெரிவித்தார். மாநாட்டில் பேசிய ஒபாமா பேசியதாவது:

பாராட்டு

ஜனநாயக கட்சியின் அதிபர் வேட்பாளர் கமலா ஹாரிஸ் மற்றும் துணை ஜனாதிபதி வேட்பாளர் டிம் வால்ஸ் ஆகியோர் தொழிலாளர் நலனுக்காக அர்ப்பணிப்புடன் பணியாற்றியவர்கள்.

கமலா ஹாரிசால் புதிய அத்தியாயத்தை உருவாக்க முடியும். ஜனநாயக கட்சியினருக்கு வேலை இன்னும் முடியவில்லை. கமலா ஹாரிசின் வெற்றிக்கு பாடுபட வேண்டும். நாட்டின் தலைசிறந்த அதிபராக அவர் திகழ்வார். அமெரிக்கர்களின் எதிர்காலத்திற்காக ஓட்டளிக்க வேண்டும். கமலாவிடம் தோற்று விடுமோ என்ற பயத்தில் டிரம்ப் உள்ளார்.

எனது நண்பர்

ஜோ பைடனை எனது ஜனாதிபதி என்று அழைப்பதில் பெருமிதம் கொள்கிறேன். அரசியலில் மிகவும் அரிதான காரியத்தைச் செய்யும் தன்னலமற்றவர். நாட்டின் நலனுக்காக தனது சொந்த லட்சியத்தை ஒதுக்கி வைத்தவர்.

பெரிய ஆபத்து நேரத்தில் ஜனநாயகத்தை பாதுகாத்த ஒரு தலைசிறந்த ஜனாதிபதியாக ஜோ பைடனை வரலாறு நினைவு கூரும். அவரை எனது நண்பர் என்று அழைப்பதிலும் பெருமிதம் கொள்கிறேன்.

இவ்வாறு அவர் பேசினார்.