நொய்டா செக்டார் 22 ஸ்ரீ வரசித்தி விநாயகர் திருக்கோவில் மற்றும் செக்டார் 62-ல் அமைந்துள்ள ஸ்ரீ விநாயகர் மற்றும் ஸ்ரீ கார்த்திகேயர் திருக்கோவில், ஆகிய இரு ஆலயங்களிலும் தீபாவளி சிறப்பு பூஜைகளுடன் பக்தி உணர்வுடனும் கொண்டாடப்பட்டது. இவ்விரு ஆலயங்களிலும் அனைத்து தெய்வங்களுக்கும் சிறப்பு அபிஷேகங்கள் நடத்தப்பட்டு, அனைத்து விக்கிரகங்களுக்கும் புத்தாடைகள் அணிவித்து அலங்காரம் செய்யப்பட்டது. தென்னிந்தியாவின் பல்வேறு கோவில்களில் இதே போன்ற பாரம்பரிய வழிபாட்டு முறைகள் கடைப்பிடிக்கப்படுவது நமது செழுமையான கலாச்சார மற்றும் ஆன்மீகப் பாரம்பரியத்தை எடுத்துக்காட்டுகிறது.

மேலும், செக்டார் 22 மற்றும் செக்டார் 62 ஆகிய இரு கோவில் வளாகங்களும் கோவில் நிர்வாகத்தின் சார்பில் கூடுதல் மின்விளக்கு அலங்காரங்களுடன் அழகு ஒளிர்ந்தன. வண்ணமயமான விளக்குகளால் அலங்கரிக்கப்பட்ட ஆலயங்கள், பக்தர்களுக்கு தெய்வீகமான மற்றும் இனிமையான பண்டிகை சூழலை உருவாக்கின.

புத்தாடைகள் அணிந்து குடும்பத்துடன் ஆலயங்களுக்கு வருகை தந்த பக்தர்களுக்கு பாரம்பரிய இனிப்புகள் பிரசாதமாக வழங்கப்பட்டது. பக்தர்கள் இறைவனை வழிபட்டு, பிரசாதம் பெற்றுச் சென்றனர்.

தீபாவளி, இந்தியா முழுவதும் மிகுந்த மகிழ்ச்சியுடனும் உற்சாகத்துடனும் கொண்டாடப்படுகிறது. ஒவ்வொரு மாநிலத்திலும் கொண்டாடும் முறைகள் சற்று மாறுபட்டாலும், தீபாவளியின் மகிழ்ச்சியும் அதன் ஆன்மிகப் பாரம்பரியமும் என்றும் மாறுவதில்லை. குறிப்பாக, தென்னிந்தியாவில் தீபாவளிக் கொண்டாட்டங்கள் அதிகாலையிலேயே தொடங்குவது வழக்கம்.
அதிகாலையில் எழுந்து எண்ணெய் தேய்த்து, சீயக்காய் பொடி பயன்படுத்தி நீராடும் கங்கா ஸ்நானம் (தலை எண்ணெய் ஸ்நானம்) செய்வது பாரம்பரிய வழக்கமாகும். இந்த நீராடல் உடலையும் உள்ளத்தையும் தூய்மைப்படுத்தி, புதிய மற்றும் வளமான ஆண்டை வரவேற்பதன் அடையாளமாகக் கருதப்படுகிறது. இதனைத் தொடர்ந்து, குடும்பத் தலைவர் குடும்ப உறுப்பினர்கள் அனைவருக்கும் புத்தாடைகளை வழங்குவார். பின்னர், செல்வம், ஆரோக்கியம், நலன் மற்றும் வளம் பெருக வேண்டி லட்சுமி பூஜை சிறப்பாக நடைபெறும். அதன் பிறகு, பாரம்பரிய தென்னிந்திய இனிப்புகள் மற்றும் கார வகைகளை குடும்பத்தினர் அனைவரும் மகிழ்ச்சியுடன் உண்டு மகிழ்வார்கள். தொடர்ந்து பட்டாசுகள் வெடித்து தீபாவளி கொண்டாடுவார்கள். குறிப்பிடத்தக்க வகையில், அதிகாலை கொண்டாட்டங்களும் பெரும்பாலும் காலை 9 மணிக்கு நிறைவடைந்துவிடும்.

தீபாவளி என்பது நண்பர்கள், உறவினர்கள் மற்றும் அண்டை வீட்டாரை சந்தித்து வாழ்த்துகளை பரிமாறிக்கொள்ளும் இனிய தருணமாகவும் அமைகிறது. குடும்பத்தினர் ஒன்றுகூடி நேரத்தைச் செலவிடுவது, இனிப்புகள் பகிர்ந்துகொண்டு மகிழ்ச்சியை வெளிப்படுத்துகின்றனர். மேலும், வீட்டை சுத்தம் செய்து தேவையற்ற பொருட்களை அகற்றுவது, தீபாவளியின் முக்கியமான பாரம்பரியமாகும். இது எதிர்மறையான எண்ணங்களையும் பழையவற்றையும் அகற்றி, புதிய நம்பிக்கைகளையும் நல்ல தொடக்கங்களும் வரவேற்பதை குறிக்கிறது.

வேலை மற்றும் இதர காரணங்களுக்காக தென்னிந்தியாவின் பல்வேறு பகுதிகளிலிருந்து இடம்பெயர்ந்து நொய்டாவில் குடியேறியுள்ள ஏராளமான குடும்பங்கள், தங்கள் பாரம்பரிய கலாச்சாரம், பண்பாடு, குடும்ப விழுமியங்கள் மற்றும் தொன்றுதொட்டு கடைப்பிடித்து வரும் பழக்க வழக்கங்களை இன்றளவும் மிகுந்த அன்புடன் பெருமையுடனும் தொடர்ந்து கடைப்பிடித்து வருவது குறிப்பிடத்தக்கதாகும்.

நொய்டாவில் வாழும் தென்னிந்தியக் குடும்பங்கள் தங்கள் பாரம்பரியத்தையும் ஆன்மிகப் பண்பாட்டையும் அடுத்த தலைமுறைக்கு எடுத்துச் செல்லும் வகையில், தீபாவளித் திருநாளை ஒற்றுமையுடனும் பக்தியுடனும் மகிழ்ச்சியுடனும் கொண்டாடி வருகின்றனர்.

- நமது செய்தியாளர் எஸ்,வெங்கடேஷ்