கொலஸ்ட்ராலில் அடர்த்தி மிகவும் குறைவாக இருப்பது எல்டிஎல் (Low-density lipoprotein). இது இதய ரத்தக் குழாய்களின் உட்பகுதியில் ஒட்டும் தன்மை உடையது. அதனால் கெட்ட கொலஸ்ட்ராலாக கருதப்படுகிறது. ஹெச்டிஎல் (High-density lipoprotein), கொலஸ்ட்ராலில் அடர்த்தி அதிகமானது, இது ரத்தக் குழாயின் உட்பகுதியில் ஒட்டாமல் புரதத்தை எடுத்து செல்ல உதவும். இதனால் உடலுக்குத் தேவையான சத்தி, ஆற்றல் முழுமையாக பெறமுடியும். இதனாலேயே இதை நல்ல கொலஸ்ட்ரால் என்கின்றனர்.

நம் உடலில் நல்ல கொலஸ்ட்ரால் எப்போதும் அதிகமாகவும், கெட்ட கொலஸ்ட்ரால் குறைவாகவும் இருக்க வேண்டும். ஆரோக்கியமற்ற ஜங்க் புட்டை குறைத்து சரிவிகித சத்தான உணவுப் பழக்கத்தைக் கடைப்பிடிப்பதன் மூலம் எல்டிஎலை அதிகப்படுத்த முடியும்.

உடல் பருமன் அதிகம் உள்ளவர்கள் மட்டுமல்ல, மெலிந்து காணப்படுபவர்களுக்கும் கூட, மாறி போன உணவு பழக்க முறையால் தற்போது கெட்ட கொலஸ்ட்ரால் உள்ளது. எனவே முதலில் உங்கள் ரத்தத்தில் இருக்கும் கொழுப்பின் அளவை கண்டறியுங்கள். அதை அறிந்து கொண்டால், நல்ல கொழுப்பின் அளவை அதிகரிக்கவும், கெட்ட கொழுப்பை குறைக்கவும் எளிதில் முடியும்.

ஹெச்டிஎல் கொலஸ்ட்ரால் அதிகரிக்க உதவும் உணவுகள் குறித்து தெரிந்துக் கொள்வோம்:

நட்ஸ் மற்றும் சீட்ஸ் : ஹெச்டிஎல் கொலஸ்ட்ரால் அதிகம் உள்ள பாதாம், வால் நட், போன்ற பருப்பு வகைகள், மற்றும், பூசணி, வெள்ளரி விதைகள் போன்றவைகளை அதிகம் எடுத்து கொள்ள வேண்டும். இதில் ஒமேகா 3 ஃபேட்டி ஆசிட் அதிகம் உள்ளது. ஸ்நாக்ஸ் போல் இதை சாப்பிட்டு வந்தால் இதயம் பலமாகும்.

முழு தானியங்கள் : முழு தானியங்களை சாப்பிட்டு வந்தால் கொலஸ்ட்ரால் குறையும். இதில் நார்ச்சத்து அதிகளவு நிறைந்துள்ளது. குறிப்பாக சிறுதானியங்களான தினை, கேழ்வரகு, கம்பு, சாமை போன்றவற்றை அதிகம் உட்கொள்ள வேண்டும்.

பழங்கள்: நார்ச்சத்து அதிகம் உள்ள பச்சை காய்கறிகள் மற்றும் ஆப்பிள், வாழைப்பழம், ஆரஞ்சு மற்றும் பேரிக்காய் போன்ற பருவகால பழங்களை சாப்பிடலாம். உடலில் தங்கியுள்ள கெட்ட கொலஸ்ட்ராலின் அளவை எளிதில் குறைக்கலாம். நிரிழிவு நோயாளிகள் மருத்துவர் பரிந்துரைத்த பழங்களை அளவோடு சாடப்பிடலாம்.

பூண்டு : பூண்டில் அலிசின் என்னும் ஆன்டி ஆக்சிடன்ட் உள்ளது. தினமும் காலையில் இரண்டு பல் பூண்டை தோல் உரித்து பச்சையாக சாப்பிடலாம். இதனால் ரத்தத்தில் உள்ள கெட்ட கொலஸ்ட்ரால் குறையும்.

மீன் சாப்பிடுங்கள்: அசைவ பிரியர்கள் அதிக அளவில் மீனை எடுத்துக்கொள்ளலாம். மீனில் உள்ள ஒமேகா-3 கொழுப்பு அமிலம் கொலஸ்ட்ரால் அளவை சமநிலைப்படுத்த உதவுகிறது.

எதை தவிர்க்கலாம்:

*சிப்ஸ், பக்கோடா, முறுக்கு போன்ற பொறித்த உணவை தவிர்க்கவும்.

*பொறித்த மீன்களைவிடவும் குழம்பில் சேர்த்த மீன்களை உண்ணலாம்

* முட்டையின் மஞ்சள் கரு தவிர்க்கலாம்.

* ஆட்டிறைச்சி, இறாலில் கொலஸ்ட்ரால் அதிகம் உள்ளது

* மது அருந்தவதை தவிர்க்கலாம்.