மினிபின் என செல்லமாக அழைக்கப்படும் மினியேச்சர் பிஞ்சர், சிறிய வகை நாய். இது, அதிகபட்சம் 13 இஞ்ச் உயரம், 5 கிலோ வரை எடை கொண்டது. சராசரியாக, 12-17 ஆண்டுகள் உயிர்வாழும்.

 சிறிய இடத்தில் கூட இதை வளர்க்கலாம். எப்போதும் சுறுசுறுப்பாக இருக்கும். நன்கு விளையாடும். இதை கட்டி போட்டு வைக்க கூடாது.

 வீட்டிற்குள் தனியாக இருப்பவர்களுக்கு ஏற்ற துணையாக இது இருக்கும். உரிமையாளரை பாதுகாப்பதையே,குறிக்கோளாக கொண்டிருக்கும். புதிய ஆட்கள் எளிதில் வீட்டிற்குள் நுழைய முடியாது.

 சிறியதாக இருப்பதால், இதை வாக்கிங் அழைத்து செல்வதில் சிரமம் இருக்காது. மென்மையான முடிகள் இருப்பதால், பராமரிப்புக்கு மெனக்கெட வேண்டியதில்லை.

 எல்லா தட்பவெப்ப சூழல்களுக்கும் தகவமைத்து கொள்ளும். பிறந்து ஓராண்டுக்கு பின் இனப்பெருக்கத்திற்கு தயாராகிவிடும். இதன் குட்டிகள், நம் உள்ளங்கை அளவே இருக்கும்.

 அதீத சுறுசுறுப்புடன் இருப்பதால், குழந்தைகள் இருக்கும் வீட்டில், முறையாக பயிற்சி அளிக்காமல், இதை வளர்க்க கூடாது. எதையும் எளிதில் கற்று கொள்ளும் என்பதால், சிறியதாக இருக்கும் போதே பயிற்சி அளிப்பது அவசியம்.

 இதன் உருவத்தை பார்த்து எடை போடக்கூடாது. அதீத ஆற்றல் கொண்ட, பெரிய வகை நாய்களான, டாபர்மேன், கிரேட்டேன், பாக்ஸர் போன்றவற்றுடன், கண்காட்சிகளில் மல்லுக்கு நிற்கும்.

 டாபர்மேன் நாயிடம் காணப்படும், பல தனித்துவ குணங்கள், மின்பின் பப்பியிடமும் காணலாம். உருவத்தை தவிர, பெரிய மாற்றங்கள் இவைகளிடம் காண முடியாது.

 மேல்நோக்கிய காது, சற்று நீண்ட கண்கள், சிறிய வால் என, வித்தியாசமான உடலமைப்பை கொண்ட மின்பின் பப்பி, உங்களுடன் இருந்தால், சுட்டித்தனமான குழந்தையின் சேட்டையும், போர்வீரனின் தற்காக்கும் ஆற்றலையும், ஒருங்கே காண முடியும், என்றார்.