முதல் முறையாக வீடு அல்லது வீட்டுமனை வாங்குபவராக இருந்தாலும், அல்லது மறுவிற்பனை சொத்தை வாங்க விரும்பினாலும், சொத்து வாங்குவதற்கான சட்டப்பூர்வ செயல்முறைகளை பின்பற்ற வேண்டும் என்கிறார், 'காட்சியா' உறுப்பினர் ஜெயபிரகாஷ்.

அவர் நம்மிடம் பகிர்ந்துகொண்டதாவது...

குறைந்தபட்சம், 30 ஆண்டுகால (முந்தைய ஆவணங்கள் கிடைக்கவில்லை என்றால் குறைந்தபட்சம், 15 ஆண்டுகள்) ஆவணங்களுடன் சொத்தின் தலைப்பை சரிபார்க்க வேண்டும். மேம்பாட்டு ஒப்பந்தம் அல்லது, 'பவர் ஆப் அட்டர்னி', கடந்த கால வழக்குகள் ஆகியன தலைப்பின் தன்மை மற்றும் சந்தைப்படுத்தல் தன்மையை உறுதிப்படுத்தவும், தடையின்றி தெளிவான தலைப்பை நிறுவவும் உதவும்.

சொத்தின் தலைப்பைச் சரிபார்ப்பதைப் போலவே, வாங்குபவர் விற்பனையாளரின் அடையாளத்தையும், குறிப்பிட்ட நிபந்தனைகளையும் உறுதிப்படுத்த வேண்டும். கூட்டாக வைத்திருக்கும் சொத்துக்களின் விஷயத்தில், அனைத்து உரிமையாளர்களையும் அடையாளம் காண வேண்டும்.

ஒரு மைனர் அல்லது மனநிலை சரியில்லாத நபரின், பெயரில் உள்ள சொத்துக்களை வாங்கும்பொழுது, தகுதிவாய்ந்த நீதிமன்றத்தின் உத்தரவு பெற்று, சொத்தை விற்க ஒரு பாதுகாவலரை நியமித்த பின்னரே, அந்த சொத்தை வாங்க வேண்டும்.

அனைத்து உரிமையாளர்களின் அடையாளம் மற்றும் ஒப்புதல் பெறப்பட்டிருக்க வேண்டும். அரசு சட்டங்கள் நிலத்தைப் பயன்படுத்துவதற்கான வழிகளை கட்டுப்படுத்துகின்றன. சொத்து எந்த பயன்பாட்டின்கீழ் உள்ளது என்பதை, கண்டறிவது இன்றியமையாதது. ஒரு பயன்பாட்டின்கீழ் உள்ள நிலத்தை, வேறு உபயோகத்திற்கு பயன்படுத்துவது சிக்கல் உண்டாக்கும் என்பதால், சொத்தின் பயன்பாட்டை உறுதி செய்வது அவசியம். வரி செலுத்தாதது, ஒரு சொத்தின் சந்தைத்தன்மையை பாதிக்கலாம்.

சொத்தை வாங்குவதற்கு முன், சொத்தில் ஏதேனும் பதிவு செய்யப்பட்ட சுமைகள் உள்ளதா என்பதை சரிபார்க்கவும். நீங்கள் அதிகார வரம்பிற்கு உட்பட்ட துணைப் பதிவாளர் அலுவலகம், கார்ப்பரேட் விவகார அமைச்சகத்தின் இணையதளத்தில் தேடலாம்.

விற்பனையாளர் வழங்கிய தகவலுக்கு எதிராக சொத்தின் அளவு மற்றும் அளவீட்டை உறுதிப்படுத்த, வாங்குபவர் ஒரு நில அளவை களஆய்வு மேற்கொள்வது நல்லது.

ரியல் எஸ்டேட் சட்டம், 2016 'ரெரா' வரம்பிற்கு உட்பட்ட எந்தவொரு திட்டமும், 'ரெரா' அதிகாரத்தில் பதிவு செய்யப்பட வேண்டும். மறுவிற்பனை சொத்தை வாங்கினால், அந்த சொத்தின் மீது கடன் நிலுவையில் உள்ளதா என்பதை சரிபார்க்க வேண்டும்.

சட்ட நிபுணரின் ஆலோசனை பெற்று, சொத்தின் ஸ்திரதன்மையை அறிந்து முதலீடு செய்வது மிகவும் நல்லது.

இவ்வாறு, அவர் கூறினார்.