தசரா திருவிழா என்றதுமே நம் நினைவுக்கு வருவது மைசூரு அரண்மனையின் வண்ண விளக்கு அலங்காரமும், அத்திருவிழாவின் மகுடமாகத் திகழும் புகழ்பெற்ற 'ஜம்போ சவாரி' ஊர்வலமும்தான்.

அந்த பிரம்மாண்ட ஊர்வலத்தின் ஆன்மாவாக, சாமுண்டேஸ்வரி தேவியின் திருவுருவம் தாங்கிய 750 கிலோ எடையுள்ள தங்க அம்பாரியைச் சுமக்கும் உயரிய பொறுப்பைத் தாங்கி நிற்கும் தனிப்பெரும் சாதனையாளர்தான் யானை 'அபிமன்யு'.

தசரா திருவிழாவில் கலந்துகொள்ளும் அனைத்து யானைகளிலும் மிக அதிக எடையைக் கொண்டதாகவும் (சுமார் 5,500 கிலோவிற்கும் மேல்), பார்ப்பவர் வியக்கும் வகையிலான கம்பீரமான உடல்வாகைக் கொண்டதாகவும் அபிமன்யு திகழ்கிறது.

இத்தகைய சிறப்புமிக்க அபிமன்யுவிற்கு, தசரா விழாவை முன்னிட்டு காடுகளில் இருந்து முறைப்படி வரவேற்பளிக்கப்பட்டு மைசூரு அரண்மனைக்கு அழைத்து வரப்பட்டபோது, பாரம்பரிய முறைப்படி 'மைசூரு தலைப்பாகை' அணிவித்து, மலர் மாலைகளுடன் சிறப்பான வரவேற்பு அளிக்கப்பட்ட நிகழ்வு அனைவரையும் மெய்சிலிர்க்க வைத்தது.

அபிமன்யு வெறும் அலங்கார யானை மட்டுமல்ல; காடுகளின் பாதுகாப்புக்காகவும், மனித-வனவிலங்கு மோதல்களைத் தடுப்பதற்காகவும் பல ஆபத்தான களங்களில் தன் உயிரைப் பணயம் வைத்துப் போராடிய ஒரு 'போர்க்கள நாயகன்'. வனத்துறையின் பட்டியலில் இதன் வீரச் செயல்கள் பல இடம்பெற்றுள்ளது.

கிராமங்களுக்குள் புகுந்து பொதுமக்களை அச்சுறுத்தும் காட்டு யானைகளைக் கட்டுப்படுத்தவும், அவற்றை மீண்டும் அடர்ந்த வனப்பகுதிக்குள் வெற்றிகரமாக விரட்டவும் பயன்படுத்தப்படும் முன்னணி கும்கி யானையாக அபிமன்யு செயல்பட்டு வந்தது.

வனத்துறையின் பல்வேறு ஆபரேஷன்களில் மிகத் திறம்படப் பங்காற்றியுள்ள அபிமன்யு, இதுவரை நூற்றுக்கணக்கான காட்டு யானைகளையும், பல ஆபத்தான புலிகளையும் திறம்படக் கட்டுப்படுத்திப் பிடிப்பதில் முக்கியப் பங்கு வகித்துள்ளது. இந்தத் துணிச்சலான செயல்களினால்தான் வனத்துறையினரும் அதிகாரிகளும் இதனை அன்போடு 'காப்டன் அபிமன்யு' என்று அழைக்கின்றனர்.

லட்சக்கணக்கான மக்கள் கூடும் கோலாகலமான தசரா திருவிழாவில், காதுகளைப் பிளக்கும் மேளதாள சத்தங்கள், பட்டாசுகள் மற்றும் வாணவேடிக்கைகளின் ஆரவாரம் என எதைக் கண்டும் மிரளாமல், மிகவும் அமைதியாகவும் பொறுமையாகவும் அந்தப் பெருந்திரளான கூட்டத்தின் மத்தியில் கம்பீரமாக ஊர்வலத்தை நடத்திச் செல்லும் தனித்துவமான மன உறுதி அபிமன்யுவிற்கு உண்டு.

நீண்ட காலமாக தசரா விழாவின் முன்னணி யானையாகச் செயல்பட்டு வரும் அபிமன்யு, கர்நாடக வனத்துறையின் மிக முக்கியமான மற்றும் வலிமையான சொத்தாகக் கருதப்படுகிறார். பாரம்பரியம், வீரம், அடக்கம் ஆகியவற்றின் சங்கமமாக விளங்கும் இந்த யானையின் பயணம், மைசூரு தசரா வரலாற்றில் என்றென்றும் தங்கம் பதித்த பக்கங்களாகப் போற்றப்படும் என்பதில் ஐயமில்லை.

-எல்.முருகராஜ்