நம்மை யாராவது தாக்க வந்தால் அல்லது ஏதேனும் மிருகம் துரத்தி வந்தால் நாம் தப்பிக்க முயற்சி செய்வோம் அல்லவா? நம்மைப் போலவே விலங்குகளும் எதிரிகளிடமிருந்து தங்களைக் காத்துக்கொள்ள சில உத்திகளைப் பயன்படுத்துகின்றன. இந்த உத்திகள் ஆச்சரியமாகவும், சுவாரசியமாகவும் உள்ளன.

கரையான்: கரையான்கள் உருவாக்கும் புற்றின் சுவர்கள் கடப்பாரையைக் கொண்டு தகர்க்க முடியாத அளவு பருமனும் வலிமையும் உடையது.

சிலந்தி: சிலந்திகள் தங்கள் வலைகளில் அறியாமல் நுழைந்துவிடும் பிற பூச்சி இனங்களுக்கு என்று தனியாக ஒரு பகுதி அமைத்து, அவற்றை அதில் சிறைப்படுத்தி விடுகின்றன.

குளவி: குளவி (வாஸ்ப் - Wasp) தன் கொடுக்குகளால் கொட்டித் தம்மைத் தாக்க வருவோர் மீது நச்சுத் திரவத்தைத் தெளித்துத் தன்னைக் காத்துக் கொள்கிறது.

தூக்கணாங்குருவிகள்: தூக்கணாங்குருவிகளின் முக்கிய எதிரி பாம்பு. இவற்றின் முட்டைகளைப் பாம்பு தின்றுவிடும். இதற்காக இவை பாம்பு நுழைய முடியாத அளவுக்கு நெருக்கமான இழைகளால் தங்கள் கூடுகளின் வாசலை அமைத்துக் கொள்கின்றன.

தேனீ: தேனீக்கள் தங்களை பாதுகாத்துக்கொள்ள பிரத்யேக பாதுகாப்பு முறையைக் கையாளுகின்றன. தேன்கூட்டைப் பாதுகாப்பதற்கு என இருக்கும் தேனீக்கள், தேன்கூட்டின் மேல் பகுதியில் இருந்துகொண்டு, தங்களது கூட்டில் உள்ள தேனீக்களைத் தவிர பிற பூச்சியினங்கள் எவற்றையும் உள்ளே அனுமதிப்பதில்லை.

நீர் எலி (பீவர் - Beaver): இது தனது வசிப்பிடத்தைத் தண்ணீருக்கு அடியில் அமைத்துக்கொள்கிறது. அந்த இடத்தை அடைய வேண்டுமெனில், 'பீவர்'களுக்கு மட்டும் தெரிந்த ரகசியமான சுரங்கம் வழியாக மாத்திரமே போக வேண்டும். சுரங்கத்தின் கடைசிப் பகுதியில் அவை குடியிருக்கும்.

முள்ளம்பன்றி: முள்ளம்பன்றி உடலில் நீண்ட முட்கள் காணப்படும். இவை உடலை அசைத்தால் முட்களில் இருந்து ஒலி ஏற்படும். இந்த ஒலி எதிரிகளை எச்சரிக்க உதவுகிறது. முள்ளம்பன்றிகள் பின்னோக்கிச் சென்று எதிரியைத் தன் முட்களால் தாக்கும்.

மான்கள்: மான்கள் நின்று கொண்டும், படுத்த நிலையிலும் உறங்கும். சில வகை மான்கள், தூங்கும்போது சுவாசத்தின் மூலமே எதிரிகள் நெருங்குவதை அறிந்துகொள்ளும்.