ஜூலை 16, 1968 - தன்ராஜ் பிள்ளை பிறந்த நாள்

இந்திய ஹாக்கி வீரர். அணியின் தலைவராகவும் இருந்தார்.15 ஆண்டுகள் விளையாடி,170 கோல்களை அடித்த பெருமைக்குரியவர். 2000இல் 'ராஜீவ் காந்தி கேல் ரத்னா' விருது பெற்றார்.

ஜூலை 17, 2010 - பன்னாட்டு நீதிக்கான உலக நாள்

போர்க் குற்றங்கள், இனப்படுகொலை போன்ற குற்றச் செயல்களை விசாரிக்க, சர்வதேச குற்றவியல் நீதிமன்றத்தால் இந்த நாள் தேர்வு செய்யப்பட்டுக் கடைப்பிடிக்கப்படுகிறது.

ஜூலை 18, 1918 - நெல்சன் மண்டேலா பிறந்த நாள்

நிறவெறிக்கு எதிராகப் போராடினார். மனித உரிமைக்கும், சுதந்திரத்துக்கும் ஆற்றிய பணியைக் கௌரவித்து, இவரது பிறந்தநாளை சர்வதேச மண்டேலா தினமாக ஐ.நா. சபை 2009இல் அறிவித்தது.

ஜூலை 19, 1827 - மங்கள் பாண்டே பிறந்த நாள்

இந்திய விடுதலைப் போராட்ட வீரர். 'சிப்பாய் புரட்சி' எனும் முதல் விடுதலைப் போராட்டத்துக்குக் காரணமாக இருந்தார். இவரது நினைவாக, 1984இல் இந்திய அரசு அஞ்சல் தலை வெளியிட்டது.

ஜூலை 20, 1822 - கிரிகோர் மெண்டெல் பிறந்த நாள்

தாவரவியலாளர், மரபியலின் தந்தை. மரபியல் கூறுகளைக் கண்டறிய 8 ஆண்டுகளில், சுமார் 28,000 செடிகளை வளர்த்து, விதிகளை வரையறுத்தார். அந்த விதிகள் மெண்டலின் விதிகள் என்றே அறியப்படுகின்றன.

ஜூலை 20, 1969 - மனிதன் நிலவில் இறங்கிய நாள்

அப்பல்லோ 11 என்ற விண்வெளி ஓடத்தை 16.7.1969 அன்று அமெரிக்கா ஏவியது. இதில் பயணித்த ஆம்ஸ்ட்ராங்கும் ஆல்ட்ரினும் 'ஈகிள்' எனும் சிறிய ரக ஓடத்தில் இறங்கி, இந்த நாளில்தான் நிலவில் கால் வைத்தனர்.