ஆண்களுக்கான ஏழாவது டி20 உலகக் கோப்பை கிரிக்கெட் போட்டி அடுத்த ஆண்டு (2020) அக்டோபர், நவம்பர் மாதங்களில் ஆஸ்திரேலியாவில் நடக்க இருக்கிறது. 16 அணிகள் பங்கேற்கும் இந்தப் போட்டியில், பாகிஸ்தான், இங்கிலாந்து, தென்ஆப்பிரிக்கா, இந்தியா, ஆஸ்திரேலியா உட்பட தரவரிசையில் முதல் 10 இடங்கள் வகிக்கும் அணிகள் நேரடியாகத் தகுதி பெற்றுவிட்டன. மீதமுள்ள 6 அணிகள் தகுதிச்சுற்று மூலம் தேர்வாகும்.

தகுதிச் சுற்றுப் போட்டிகள் துபாய் மற்றும் அபுதாபியில் அக்டோபர் 18இல் தொடங்கி நவம்பர் 2ஆம் தேதி வரை நடக்கிறது. தகுதிச் சுற்றில் கலந்துகொள்ளும் 14 அணிகள் இரண்டு பிரிவாகப் பிரிக்கப்பட்டுள்ளன.

'ஏ' பிரிவில் ஸ்காட்லாந்து, நெதர்லாந்து, பப்புவா நியூ கினியா, நமீபியா, சிங்கப்பூர், கென்யா, பெர்முடா ஆகிய அணிகளும், 'பி' பிரிவில் ஐக்கிய அரபு அமீரகம், அயர்லாந்து, ஓமன், ஹாங்காங், கனடா, ஜெர்சி, நைஜீரியா ஆகிய அணிகளும் இடம் பெற்றுள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் ஒரு முறை மோத வேண்டும். லீக் மற்றும் பிளேஆப் சுற்றின் முடிவில் முதல் 6 இடங்களைப் பிடிக்கும் அணிகள் உலகக் கோப்பை போட்டிக்குத் தகுதிபெறும்.