கேரளாவில், மார்க்சிஸ்ட் கம்யூனிஸ்ட் கட்சியைச் சேர்ந்த, முதல்வர் பினராயி விஜயன் தலைமையிலான, இடது ஜனநாயக முன்னணி ஆட்சி நடக்கிறது; இங்கு, ஏப்., 9ல் சட்டசபை தேர்தல் நடக்கவுள்ளது.

கடந்த சட்டசபை தேர்தலில், இந்திய கம்யூனிஸ்ட் கட்சி சார்பில், திருச்சூர் மாவட்டம், நாட்டிகா தொகுதியில் வெற்றி பெற்றவர், சி.சி.முகுந்தன். ஆனால், தற்போது இவர் அடிக்கும், 'பல்டி'களை பார்த்து, அனைவரும் ஆச்சரியப்படுகின்றனர்.

சமீபத்தில், நாட்டிகா தொகுதியில் மீண்டும் போட்டியிட, இந்திய கம்யூனிஸ்ட் கட்சி மேலிடத்திடம், 'சீட்' கேட்டு விண்ணப்பித்தார், சி.சி.முகுந்தன்; ஆனால், கட்சி மேலிடம் கைவிரித்து விட்டது.

அடுத்த நாளே, காங்கிரஸ் மேலிடத்தை தொடர்பு கொண்டு பேசிய முகுந்தன், 'உங்கள் கட்சி சார்பில் போட்டியிடுகிறேன். எனக்கு நாட்டிகா தொகுதியில் வாய்ப்பு தாருங்கள்...' என்றார். உள்ளூர் காங்., பிரமுகர்கள் எதிர்ப்பு தெரிவித்ததால், காங்கிரஸ் மேலிடமும் அவரை கைவிட்டது.

சற்றும் மனம் தளராத முகுந்தன், பா.ஜ.,வை அணுகினார்; அங்கு அவருக்கு உடனடியாக, 'சீட்' கொடுத்து விட்டனர். இதை பார்த்த சக அரசியல்வாதிகள், 'அடிக்கடி நிறம் மாறும் பச்சோந்தியையே, முகுந்தன் மிஞ்சி விட்டாரே...' என, கிண்டல் அடிக்கின்றனர்.