டவுட் தனபாலு: த.வெ.க., அரசுக்கு உங்க கட்சி ஆதரவு தந்தாலும், தி.மு.க., தயவில் ஜெயித்து எம்.பி.,யான நீங்க, இன்னும் அந்த கட்சிக்கு விசுவாசமாகவே இருக்கீங்க என்பது, 'டவுட்' இல்லாம தெரியுது... அதனால தான், ஆட்சியில் பங்கேற்க முட்டுக்கட்டை போடுறீங்க என்பதிலும், 'டவுட்'டே இல்லை!

சிவகங்கை, காங்., - எம்.பி., கார்த்தி: கடந்த பார்லிமென்ட் தொடரில் தொகுதி மறுசீரமைப்பை எதிர்த்தவர்கள், இந்த முறையும் எதிர்ப்பர் என நம்புகிறேன். ஏனெனில், தமிழகத்திற்கு லோக்சபா எம்.பி., தொகுதிகள் எண்ணிக்கை, 39ல் இருந்து 60 ஆக அதிகரிக்கும்; ஆனால், உத்தர பிரதேசத்துக்கு 80ல் இருந்து 120 ஆகும். லோக்சபாவில், 543 பேர் இருந்தாலே பேச நேரம் கிடைக்காது; எம்.பி.,க்கள் எண்ணிக்கை 815 ஆக உயர்ந்தால், பேச வாய்ப்பே இல்லாமல், கூடிப் பிரியும் இடமாக பார்லிமென்ட் மாறிவிடும்.

டவுட் தனபாலு: அது சரி... நீங்க உட்பட நம் மாநில எம்.பி.,க்கள் பலரும் இதுவரை லோக்சபாவில் பேசி பேசி, தமிழகத்துக்கு எத்தனை திட்டங்களை கொண்டு வந்திருக்கீங்கன்னு பட்டியல் போட முடியுமா...? அதனால, எண்ணிக்கையில் எதுவுமில்லை; மக்களுக்காக பாடுபடணும் என்ற எண்ணம் இருந்தால் போதும் என்பதில், 'டவுட்'டே இல்லை!

வி.சி.க., தலைவர் திருமாவளவன்: எங்களை பார்த்து, 'இரண்டு எம்.எல்.ஏ.,க்களை வைத்துக் கொண்டு இவ்வளவு ஆட்டமா' என்கின்றனர். வெறும் இரண்டு இடங்களில் ஜெயித்து விட்டு, அமைச்சர் பதவி வாங்கி விட்டதாக பேசுகின்றனர். இரண்டு 'சீட்'கள் இல்லாமல் ஆட்சி அமைக்க முடியாமல் தவித்தது, அவர்களுக்கு தெரியவில்லை; நினைவில்லை. ஆட்சி அமைக்க, அந்த இரண்டு சீட்கள் அவசியம் தேவை.

டவுட் தனபாலு: இந்த இரண்டு சீட் பஞ்சாயத்து அஞ்சு வருஷமும் பேசப்படும்னு பயப்படுறீங்களோ...? அதனால தான், தி.மு.க.,வை தீவிரமா எதிர்க்காம, 'அவங்களுடன் நட்பு இன்னும் தொடருது'ன்னு சொல்லி, அந்த பக்கமும், 'துண்டு' போட்டு வச்சிருக்கீங்களோ என்ற, 'டவுட்' தான் வருது!