பாம்பன் துாக்கு பாலத்தில் அத்துமீறி அதிகாரிகளின் உறவினர்கள் 'செல்பி'
பாம்பன் துாக்கு பாலத்தில் அத்துமீறி அதிகாரிகளின் உறவினர்கள் 'செல்பி'
UPDATED : அக் 09, 2026 01:41 AM
ADDED : அக் 08, 2026 07:52 PM

ராமேஸ்வரம்: பாம்பன் புதிய ரயில் துாக்கு பாலத்தில், உயர் அதிகாரிகளின் உறவினர்கள் அத்துமீறி நுழைந்து 'செல்பி' எடுத்தது சர்ச்சையாகி உள்ளது.
ராமநாதபுரம் மாவட்டம், பாம்பன் கடலில் புதிய ரயில் பாலத்தின் நடுவில், 'லிப்ட்' முறையில் இயங்கும் துாக்கு பாலம் உள்ளது. இதனை, பாம்பன் தேசிய நெடுஞ்சாலை பாலத்தில் நின்றபடி சுற்றுலா பயணியர் செல்பி எடுப்பர்.
நேற்று முன்தினம் ராமேஸ்வரத்திற்கு ரயில்வே அதிகாரி, உறவினர்கள் வந்தனர். அவர்கள், பாம்பன் புதிய ரயில் பாலத்திற்கு வந்து, துாக்கு பாலத்தின் துாண் மேல் தளத்திற்கு சென்றனர்.
பாதுகாப்பு உபகரணங்கள் இன்றி ஆபத்தான முறையில் நின்றபடி தங்கள் மொபைல்போனில் செல்பி எடுத்தனர். அந்த வீடியோ, சமூக வலைதளங்களில் பரவி சர்ச்சையாகி உள்ளது. இதுகுறித்து, தெற்கு ரயில்வே உயர் அதிகாரிகள் விசாரித்து வருகின்றனர்.
