பா.ம.க., தலைவர் அன்புமணி அறிக்கை: 'தற்காலிக அடிப்படையில் பணி நியமனம் செய்யக்கூடாது' என, உச்ச நீதிமன்றம் கூறியுள்ளது. ஆனால், தி.மு.க., ஆட்சிக்கு வந்த பிறகு செய்த பணி நியமனங்களில், 50 சதவீதம் தற்காலிக நியமனங்கள் தான். அனைத்து நிலைகளிலும் தனியார் நிறுவனங்கள் வாயிலாக, குத்தகை முறையில் பணியாளர்களை நியமிப்பதை புதிய கலாசாரமாக தி.மு.க., அரசு மாற்றியுள்ளது.

'குத்தகை' முறையில் தானே எடுத்தவங்களுக்கும், கொடுத்தவங் களுக்கும் பெரிய லாபம் கிடைக்கும்!

அனைத்து மக்கள் அரசியல் கட்சி தலைவர் ராஜேஸ்வரி பிரியா அறிக்கை: சென்னை ஆர். கே. நகர் தொகுதி தி.மு.க., - எம்.எல்.ஏ., எபிநேசரிடம், 'மகளிர் உரிமைத் தொகை மாதம், 1,000 ரூபாய் வருவதில்லை?' என, பெண்கள் கூறியபோது, 'மென்டல் மாதிரி பேசாதீங்க' என திட்டியது தான் திராவிட மாடலா? ஓட்டு கேட்க வரும்போது, 'அம்மா, அக்கா' என்பீர்கள்; பதவிக்கு வந்ததும், பைத்தியம் என்பீர்களா? வரும் தேர்தலில், தி.மு.க.,வினரின் திமிரை பெண்கள் அடக்குவர்.

தி.மு.க., ஆட்சியை வீட்டுக்கு அனுப்ப, எதிர்க்கட்சிகள் வேண்டாம்... இந்த மாதிரி எபிநேசர்களே போதும்!

அ.தி.மு.க., மருத்துவ அணி மாநில இணை செயலர் டாக்டர் சரவணன் அறிக்கை: அ.தி.மு.க., பொதுச்செயலர் பழனிசாமி, எங்கெல்லாம் பேசுகிறாரோ, அந்த கூட்டத்தில் காலி ஆம்புலன்ஸ்களை அனுப்பி, கூட்டத்தை திசை திருப்புகின்றனர். ஜெ., ஆட்சியில் ஆம்புலன்ஸ்கள், மக்கள் உயிர் காக்க பயன்பட்டன. ஆனால், இன்று ஸ்டாலின் அரசு, தேர்தல் காலங்களில் பணத்தை பட்டுவாடா செய்து பதுக்குவதற்கும், தற்போது பழனிசாமியின் எழுச்சி பயணத்தை திசை மாற்றம் செய்வதற்கும் பயன்படுத்துகிறது. காலி ஆம்புலன்ஸ் மூலம் அநாகரிக அரசியல் செய்யும் தி.மு.க.,வை, 2026 தேர்தலில் மக்கள் காலி செய்து வீட்டுக்கு அனுப்புவர்.

'சைரன்' ஒலிக்க ஓடும் ஆம்புலன்ஸ்களே, ஆளுங்கட்சி வெற்றிக்கு, 'சங்கு ஊதிடும்'னு எச்சரிக்கிறாரோ?