ராஜினாமா செஞ்சவங்களுக்கு இடைத்தேர்லில் சீட் தராமல், குதிரை பேர குற்றச்சாட்டை முறியடிக்கலாமே!

புவனகிரி அ.தி.மு.க., - எம்.எல்.ஏ., அருண்மொழித்தேவன் பேட்டி:

த.வெ.க., அரசு, சில கட்சிகளின் ஆதரவோடு ஆட்சியில் அமர்ந்துள்ளது. அந்த கட்சிகள் மீது, த.வெ.க.,வுக்கு நம்பிக்கை இல்லாமல் இருக்கலாம். கூடுதலாக சில இடங்களில் தாங்களே வெற்றி பெற்றால், ஆட்சியை தொடர்ந்து நடத்தலாம் என்பதற்காக ஆட்களை பிடிக்கும் வேலையில் அக்கட்சி ஈடுபட்டுள்ளது. ஏதோ ஒரு காரணத்திற்காக சிலர், எம்.எல்.ஏ., பதவியை ராஜினாமா செய்துவிட்டு த.வெ.க.,வில் சேர்ந்துள்ளனர். அவர்கள் மீண்டும் இடைத்தேர்தலில் போட்டியிட்டால், அவர்களை மக்கள் தோற்கடிக்க வேண்டும்.

இஷ்டத்துக்கு கட்சி தாவி, மக்களை ஏமாளிகள் ஆக்குவோரை வீட்டுக்கு அனுப்புவதே சரியான தீர்ப்பா இருக்கும்!

தி.மு.க., முதன்மை செயலர் நேரு பேச்சு:

தேர்தல் முடிவுகளை பார்த்தால், நமக்கும் தமிழக வெற்றிக் கழகம் கட்சிக்கும் உள்ள ஓட்டு வித்தியாசம் வெறும், 17 லட்சங்கள் தான். 27 தொகுதிகளில், 1,000 முதல் 2,000 ஓட்டுகள் என்ற மிகக் குறைந்த வித்தியாசத்திலேயே வெற்றியை தவற விட்டிருக்கிறோம். சட்டசபை தேர்தல், சில நாட்கள் முன்னதாக நடந்திருந்தால் வெற்றி வாய்ப்பு நமக்கே சாதகமாக இருந்திருக்கும். கடைசி மூன்று நாட்களில் வீசிய மாற்று காற்றால், இந்த சிறிய பின்னடைவு ஏற்பட்டுள்ளது.

முதல்வராக இருந்த ஸ்டாலினே தேர்தலில் தோற்று போனது, இவருக்கு சிறிய பின்னடைவா தெரியுதா?

திருச்சி ம.தி.மு.க., - எம்.பி., துரை பேட்டி:

ம.தி.மு.க., என்பது அரசியல் இயக்கம். எங்களுடைய நிலைப்பாடு குறித்து, நான் மட்டும் முடிவெடுக்க முடியாது. உயர்மட்ட நிர்வாகிகள் பலர் உள்ளனர். அவர்களின் கருத்துகளை கேட்டு தான், உள்ளாட்சி தேர்தலில், தி.மு.க., கூட்டணியில் தொடர்வது குறித்து முடிவு செய்ய முடியும். த.வெ.க.,வை மற்றொரு திராவிட இயக்கமாகத் தான் நான் பார்க்கிறேன்.

த.வெ.க., கூட்டணிக்கு இவர் அச்சாரம் போடுவது அப்பட்டமா தெரியுது... ஆனாலும், காலி பெருங்காய டப்பாவான இவங்க கட்சியை, விஜய் சேர்த்துக்குவாரா?