ஒப்பந்த ராணுவம்!

நாடுகளின் பாதுகாப்பை உறுதிப்படுத்துகிறது அந்தந்த நாட்டு ராணுவம். இதற்காக, அரசுகள் மிகப்பெரும் தொகையை செலவிடுகின்றன. பட்ஜெட்டில், 25 சதவீதம் பணம் வரை ராணுவத்திற்கு செலவிடுகின்றன சில நாடுகள்.

உலகில் ராணுவ பலம் உடைய நாடுகளே வல்லரசாக திகழ்கின்றன, என்ற போதும் சில நாடுகள் ராணுவம் வைத்திருக்கவில்லை. அவற்றின் பாதுகாப்புக்கு எந்த குறைவும் ஏற்படவில்லை.

ராணுவம் இல்லாதவை, அளவில் சிறிய நாடாக இருக்கும் என எண்ணத் தோன்றும்; அல்லது பொருளாதாரத்தில் நலிந்திருக்கும் என கணிப்போம்.

ஆனால், அவை உண்மை அல்ல... ராணுவ அமைப்பு இல்லாத பெரிய நாடுகளும் உள்ளன. அது எப்படி சாத்தியமாகிறது என்பதை பார்ப்போம்...

ஐஸ்லாந்து

ஐரோப்பிய நாடுகளில் ஒன்று. வட அட்லாண்டிக் கடல் பகுதியில் உள்ளது. இயற்கை எழில் மிகுந்தது. ஏராளமான சுற்றுலா மையங்கள் உள்ளன. இந்த நாட்டில், கி.பி.,1869 முதல் நிலையான ராணுவம் இல்லை.

இது, 'நெட்டோ' என்ற வட அட்லாண்டிக் நாடுகளின் கூட்டமைப்பில் உறுப்பினராக உள்ளது. அதன்படி, அமெரிக்காவுடன் ராணுவ ஒப்பந்தம் செய்துள்ளது. ராணுவத் தேவை ஏற்பட்டால் அமெரிக்கா உதவி வருகிறது.

வனுவாட்டு

ஆஸ்திரேலியா கண்டத்தில் உள்ள மிகச்சிறிய தீவு நாடு. தெற்கு பசிபிக் கடலில் அமைந்துள்ளது. இங்கு, 3 லட்சம் பேர் வசிக்கின்றனர். உள்நாட்டு பாதுகாப்புக்கு காவல்துறை உள்ளது. இந்த அமைப்பால் பாதுகாப்பை மேற்கொள்ள முடியாத நிலை ஏற்பட்டால், 'மொபைல் போர்ஸ்' என்ற அமைப்பு உதவும்.

இங்கு காவல்துறையில் மொத்தம், 300 பேர் மட்டுமே உள்ளனர். இவர்களுக்கு, மிகச்சிறந்த பயிற்சி கொடுக்கப்படுகிறது. நவீன ஆயுதங்களை கையாளும் திறன் மிக்கது இந்த காவல்துறை. பெரிய கலவரங்களையும் கட்டுப்படுத்தியுள்ளது.

கோஸ்டாரிகா

மத்திய அமெரிக்கா பகுதியில் உள்ளது. இந்த நாட்டின் அரசியல் அமைப்பு, ராணுவத்திற்கு தடைவிதித்துள்ளது. இருப்பினும் பெயரளவிற்கு சிறிய ராணுவம் ஒன்று உள்ளது. அதில் பெரிய அளவில் ஆயுதங்கள் கிடையாது. ஆனால், உள்நாட்டு பாதுகாப்புக்கு காவல்துறை இருக்கிறது.

மொனாக்கோ

மேற்கு ஐரோப்பிய நாடுகளில் ஒன்று. இங்கு நிலையான ராணுவம் கிடையாது. ஆனால், ஐரோப்பிய நாடான பிரான்சுடன் ராணுவ ஒப்பந்தம் செய்துள்ளது. ராணுவ தேவை ஏற்பட்டால், பிரெஞ்சு படை உதவும். உள் நாட்டில் ஏதாவது பிரச்னை வந்தால் சமாளிக்க காவல்துறை உள்ளது.

மொரிசியஸ்

ஆப்ரிக்கா கண்ட பகுதியில் உள்ள நாடு. இந்திய பெருங்கடலில் உள்ளது. இயற்கை வளங்கள் உடையது. சுற்றுலா தொழிலால் உயர்ந்துள்ளது. இங்கு, 1968- முதல் நிலையான ராணுவ அமைப்பு கிடையாது.

ஆனால், உள்நாட்டு பாதுகாப்புக்கு, 10 ஆயிரம் பேர் கொண்ட காவல்துறை செயல்படுகிறது. இதில், 500 பேர் கடற்கரை பாதுகாப்பு பணிகளில் ஈடுபடுத்தப்பட்டுள்ளனர். இங்கு கடல் சார்ந்து ஏதேனும் பிரச்னை ஏற்பட்டால், நம் கடற்படை உதவியை பெறுவர். இதற்காக உடன்படிக்கை கையெழுத்தாகியுள்ளது.

பனாமா

மத்திய அமெரிக்க நாடு இது. இங்கு, 1990ல் ராணுவ அமைப்பு முற்றிலும் கைவிடப்பட்டது. தேசிய பாதுகாப்பு படை உள்ளது. உள்நாட்டு பாதுகாப்புக்கு காவல்துறை உள்ளது.

டோமினிக்

கரீபியன் பகுதியில் உள்ள மிகச்சிறிய தீவு நாடு. இங்கு, 1981 முதல் நிலையான ராணுவ அமைப்பு இல்லை. இது, 'ரீஜினல் செக்யூரிட்டி சிஸ்டம்' என்ற சர்வதேச பாதுகாப்பு திட்டத்தில் பாதுகாக்கப்படுகிறது. இந்த அமைப்பு கிழக்கு கரீபியன் தீவு பகுதியில் பல நாடுகளை பாதுகாத்து வருகிறது.

ஜெயின்ட் லுாசியா

கிழக்கு கரீபியன் தீவு நாடுகளில் ஒன்று. உள்நாட்டு பாதுகாப்புக்கு காவல்துறை அமைப்பு உள்ளது. இதில், 116 பேர் பணிபுரிகின்றனர். இந்த அமைப்பே நாட்டையும் பாதுகாத்து வருகிறது.

காவல் துறையில் சிறப்புப் பிரிவு ஒன்றும் இருக்கிறது. இதுவும், ரீஜினல் செக்யூரிட்டி சிஸ்டம் அமைப்பில் ராணுவ பாதுகாப்பை பெற்று வருகிறது.

கிரிபாஸ்

ஆஸ்திரேலியா கண்ட பகுதியில், 33 தீவுகளை உள்ளடக்கிய நாடு. மத்திய பசிபிக் பெருங்கடலில் இருக்கிறது. இங்கும் நிலையான ராணுவ அமைப்பு இல்லை.

உள்நாட்டு பாதுகாப்புக்கு காவல்துறை செயல்படுகிறது. சிறிய அளவில் ஆயுதங்கள் மற்றும் ரோந்து படகுகளை பயன்படுத்துகிறது. வெளிநாட்டு அச்சுறுத்தல் ஏற்பட்டால், ஆஸ்திரேலியா கண்ட பகுதியில் நியூசிலாந்து மற்றும் ஆஸ்திரேலிய நாட்டு ராணுவங்கள் உதவும். இதற்காக, ஒப்பந்தம் செய்துள்ளது கிரிபாஸ்.

- என்றென்றும் அன்புடன், அங்குராசு.