அன்புள்ள பிளாரன்ஸ்,

என் வயது, 32; இல்லத்தரசியாக உள்ளேன். தனியார் பேருந்து ஓட்டுனராக பணிபுரிகிறார் கணவர்.

இரு குழந்தைகள்; மூத்தவனுக்கு வயது, 10; 5ம் வகுப்பு படிக்கிறான்.

இளையவளுக்கு வயது, 8; 3ம் வகுப்பு படிக்கிறாள்.

மூத்தவனுக்கு, கை, கால் விரல்களில் சொத்தையாக உள்ளன; சொத்தையான நகங்களிலிருந்து துர்நாற்றம் வீசுகிறது. இதை போக்க என்ன சிகிச்சை செய்யலாம்.

அன்பு மிக்க அம்மா...

கை, கால் விரல்கள் சொத்தையை, 'டீனியா உங்கியம்' அல்லது 'ஆங்கோமைகோசிஸ்' என்பர். நகங்கள் நிறம் மங்கி, தடித்து, நொறுங்கி காணப்படும்; நக சொத்தை, 65 வயதை தாண்டியவர்களுக்கும், நீரிழிவு நோயாளிகளுக்கும் அதிகம் ஏற்படும்.

ஒரு நாளில், எட்டு அல்லது 10 மணி நேரம் பூட்ஸ் அணிபவர்களுக்கு நக சொத்தை வரும்.

நகங்களை, ஈரமாகவும், வியர்வையுடனும், அழுக்காகவும் வைத்திருந்தால் சொத்தை பீடிக்கும். நகங்களில் காயம் ஏற்பட்டாலும், சொத்தை உருவாகும்.

பொது நீச்சல் குளங்களில், தினமும் நீந்துபவருக்கு, நக சொத்தை வரும்.

ரத்த ஓட்டம் குறைவாக இருந்தாலோ, நோய் எதிர்ப்பு சக்தி குறைவாக இருந்தாலோ, நக சொத்தை வந்தே தீரும்.

பூஞ்சை காளான், உடல் முழுக்க பரவும் நிலைக்கு, 'செல்லுலைட்டிஸ்' என்று பெயர்.

நக சொத்தை நீங்க சுயசுத்தம் மிக அவசியம்; குளித்த பின், கை, கால், விரல் நகங்களை ஈரம் போக துடைத்தல் நலம். பூட்சின் காலுறைகளை தினமும் மாற்றி சுத்தம் செய்து அணிவது நல்லது. பள்ளி நேரம் தவிர பூட்சை கழற்றி, செருப்புடன் உலவுவது சிறப்பு!

மகனை தோல் நோய் மருத்துவரிடம் காட்டவும்; கால்ஷியம் மாத்திரைகள் தருவார்.

* டெர்பினாபைன் (லாமிசில்)

* இட்ராகோனசோல் (ஸ்போரோ நாக்ஸ்)

* ப்ளூகோனலோஸ் (டிப்ளூகேன்)

* கிரிசியோபுல்வின் போன்ற மாத்திரைகளையும் சிபாரிசு செய்வார்.

கீழ்க்கண்ட வீட்டு வைத்தியங்களை செய்து, நக சொத்தையிலிருந்து குணம் பெறலாம்.

* பாம்புவேர் மூலிகையை சாந்து போல் அரைத்து, நகங்களில் தடவலாம்

* டீ ட்ரீ எண்ணெயை நகங்களில் பூசலாம்

* ஓரிகானா எண்ணெயை நகங்களில் பூசலாம்

* ஆலிவ் இலைகளை அரைத்து பூசலாம்

* ஓசோனை டேட் எண்ணெயை பூசலாம்

* வினிகர் ஒரு பாகம், தண்ணீர் இரு பாகம் கலந்து, நகங்களில் பூசி, 20 நிமிடத்திற்கு பின் கழுவலாம்

* வெள்ளைப் பூண்டை நசுக்கி, அரைத்த விழுதை நகங்களில் தடவலாம்

* உணவில், தயிர், புரோட்டீன், இரும்பு, கொழுப்பு, கால்ஷியம், வைட்டமின் - டி மிகுந்தவற்றை அதிகம் சேர்க்க வேண்டும்

* நக சொத்தை குணமானாலும், ஒரு இடைவெளி விட்டு மீண்டும் வர வாய்ப்பிருக்கிறது; அதனால், தொடர்ந்து சிகிச்சையும், சுய சுத்தமும் பேணுதல் அவசியம்!

- அன்புடன், பிளாரன்ஸ்.