ராமநாதபுரம், ராஜா உயர்நிலைப் பள்ளியில், 1951ல், 6ம் வகுப்பு படித்துக் கொண்டிருந்தபோது, தக் ஷிண பாரத் ஹிந்தி பிரசார சபை சார்பில், ஹிந்தி வகுப்புகள் ஆரம்பித்திருந்தனர்.

பள்ளி வகுப்பு நேரம் முடிந்து, மாலை 5:00 மணிக்கு, சிறப்பு ஹிந்தி வகுப்புகள் எடுப்பர்.

வகுப்பு முடிய, 6:00 மணி ஆகிவிடும். அதனால், விளையாட போக முடியவில்லை. வகுப்புக்கு அடிக்கடி மட்டம் போட ஆரம்பித்தேன். இதை கவனித்த ஹிந்தி ஆசிரியர் சங்கர்ராம், என் அம்மாவிடம் விபரத்தைக் கூறி விட்டார்.

கோபத்தில் அடித்து விட்டார் அம்மா. அன்று முதல் ஒழுங்காக வகுப்புக்கு செல்ல ஆரம்பித்தேன். நன்றாக படித்து முதல் வகுப்பில் தேறினேன்; பதக்கமும் கிடைத்தது. ஹிந்தியில், எம்.ஏ., படித்து, ஒடிசா மாநில பள்ளியில் ஆசிரியராக பணி புரிந்தேன்.

இப்போது என் வயது, 80; ஓய்வு பெற்ற பின், அந்த ஆசிரியர் நினைவாக, ஏழைக் குழந்தைகளுக்கு இலவசமாக, ஹிந்தி கற்றுக்கொடுக்கிறேன்.

- மரகதம், ஹைதராபாத்.