மர்மங்கள் நிறைந்தது, 'மச்சம்' என்ற கரும்புள்ளி. அது, ஏன் உருவாகிறது என்ற கேள்விக்கு விடை இருக்காது. உடலில் தோன்றும் கருமை பகுதியை, மச்சம் என்கிறோம். இது, சிறு புள்ளியாகவும் இருக்கலாம்; பொட்டு போன்று அகலமாகவும் இருக்கலாம்.

உடலுக்கு நிறமளிப்பதில், 'மெலனின்' என்ற நிறமி, முக்கிய பங்கு வகிக்கிறது. உடலில், மெலனின் அதிகம் இருந்தால் கருப்பாகவும், மிகக் குறைவாக இருந்தால், வெண்மையாகவும் உடல் காட்சித் தரும்.

மெலனின் மிக அதிகமாக இருக்கும் பகுதி, மச்சம் எனப்படுகிறது.

பெரும்பாலான மச்சங்கள் பிறக்கும் போதே உள்ளன. அவை, மரணம் வரை தொடர்கின்றன. உடலில் சராசரியாக, 14 மச்சங்கள் இருப்பதாக கணிக்கப்பட்டுள்ளது. இன்னன்ன பகுதியில் மச்சம் உண்டாகும் என்று குறிப்பாக சொல்ல முடியாது.

மண்டையின் மேற்புறத்திலிருந்து குதிக்கால் வரை, எங்கு வேண்டுமானாலும் தோன்றலாம். முதுகு மற்றும் மார்புப் பகுதியில்தான் அதிகம் காட்சியளிக்கின்றன.

மச்சம் உள்ள பகுதியில், ரத்த குழாய் இருக்காது என்பதும், மச்சம் வளர்ச்சியடையாது என்பதும் தவறு! எந்த திசுவின் மீது மச்சம் உள்ளதோ அதனுடன் சேர்ந்து வளர்ச்சியும் அடைகிறது. எனவே, ஒரு மச்சத்தில் ரத்தக் குழாய் திசுக்கள் இருக்கலாம் அல்லது தோலின் நிறமி திசுக்கள் இருக்கலாம்.

மச்சம் குறித்து யாரும் கவலைப்படுவதில்லை. அது மிகப் பெரிதாக இருந்தாலோ, முகத்தில் பெரியதாக காணப்பட்டாலோ மட்டும்தான் கவலைப் படுகின்றனர். அறுவை சிகிச்சை மூலம் நீக்க முயல்கின்றனர்.

உடல் மச்சங்களைப் பற்றி கவலைப்படாமல் இருக்கக் கூடாது. ஏற்கெனவே நெடுங்காலமாக இருக்கும் மச்சம் குறித்து கவலை வேண்டாம். ஆனால், புதிதாக தோன்றி வளர துவங்கினால், மருத்துவரிடம் ஆலோசனை பெறுவது நல்லது.

- அபிஷேக்