* எஸ். சந்திரன், மேலுார்: நான் வாழ்க்கையில் முன்னேற நினைக்கிறேன்... அதற்கு, உதவியாய் இருப்பது எவை?

நமக்கு சரியான துணை, நம் வாழ்க்கையில் ஏற்பட்ட தோல்விகள் தான்! இந்த தோல்வி அனுபவங்கள், நம்மை வெற்றிப் பாதையில் அழைத்துச் செல்லும்!

ஆ. மஞ்சு, ஈரோடு: கண்ணாடி போடாமல் கடைசி வரை வாழ முடியுமா?

இப்போதுள்ள பழக்க வழக்கங்களால் முடியவே முடியாது; அதுவும் போக, இப்போதுள்ள உணவு பழக்கங்களாலும், கண்ணாடி நிலை ஏற்படுகிறது. கண்ணாடி வேண்டாம் என்றால், ஆபரேஷன் மூலம் கண்ணுக்குள்ளேயே, 'லென்ஸ்' பொருத்திக் கொள்ளும், 'டெக்னாலஜி'யும் வந்து விட்டது; அதைப் பயன்படுத்திக் கொள்ளலாம்!

ஆர். ஜெயந்தி, நெல்லை: தம்பதியர், தமக்கு ஆண் குழந்தை பிறக்க வேண்டும் என்று விரும்புகின்றனரா, பெண் குழந்தை பிறக்க வேண்டும் என்று விரும்புகின்றனரா?

பெண் என்றால் செலவு என்ற பொதுவான கருத்தாலும், வருமானம் வரும் என்ற எதிர்பார்ப்பால், ஆண் குழந்தையையே விரும்புகின்றனர்!

* முருகு. செல்வகுமார், சென்னை: தி.மு.க.,விற்கு அதன் கூட்டணி கட்சிகள் கட்டுப்படுவது போல், அ.தி.மு.க., கூட்டணி கட்சிகள் அவ்வாறு இருப்பதில்லையே... ஏன்?

ஆட்சியில் இல்லாத, தி.மு.க.,வால் எதுவும் செய்ய முடியாது என்பதால், மவுனம்! இதுவே, 'கூட்டணியை முறிப்போம்...' என்று பயம் காட்டுவதால், 20 சதவீத போராட்டம்; அவ்வளவு தான்!

ஆர். ஜெயலட்சுமி, சென்னை: சனி பெயர்ச்சி உமக்கு எப்படி?

வீண் குழப்பங்களுக்கும், மன உளைச்சல்களுக்கும் நான் இடம் கொடுக்க மாட்டேன். அதனால், இவற்றை படிப்பதும் இல்லை; பிறர் சொல்ல, கேட்பதும் இல்லை!

எஸ். முருகராஜ், மதுரை: எப்போதும் உண்மையே பேச வேண்டும் என்கின்றனரே...

உண்மையே பேசினால், அதை மறக்க முடியாது... பொய் பேசினால், நினைவில் வைத்துக் கொள்வது சிரமமாயிற்றே!

* எஸ். முருகேசன், திருத்தங்கல்: முதல்வர் ஆவதற்கு உடல் தோற்றமும் முக்கியம்தானே... கமல், முரட்டு மீசை மற்றும் முரட்டு தோற்றத்துடன் காணப்படுகிறாரே... இவர், முதல்வர் பதவிக்கு ஆசைப்படலாமா?

ஆசைப்படலாம்! இந்த தோற்றத்தில் இருப்பவர்களைக் கண்டுதானே பிறர் பயப்படுகின்றனர்! லஞ்ச அரசு அதிகாரிகளுக்கு பயம் ஏற்படும் தானே!