பள்ளி பாடப் புத்தகத்தில் இளையராஜா - ஏ.ஆர்.ரஹ்மான்!

தமிழ் சினிமாவின் முன்னணி இசை அமைப்பாளர்களான இளையராஜா - ஏ.ஆர்.ரஹ்மான் ஆகிய இருவரும், வரும் கல்வி ஆண்டிற்கான, பிளஸ் 1 தமிழ்ப் பாடப் புத்தகத்தில் இடம் பெறுகின்றனர். அப்படி அவர்கள் இருவரும் இடம்பெறும் பாடத்திற்கு, 'இசைத்தமிழர் இருவர்' என்று பெயர் வைக்கப்பட்டுள்ளது. அதோடு, 'சிம்பொனி தமிழர்' என்ற பெயரில் இளையராஜா பாடமும், 'ஆஸ்கர் தமிழர்' என்ற பெயரில் ஏ.ஆர்.ரஹ்மான் பாடமும் இடம்பெறுகிறது.

— சினிமா பொன்னையா

காஜல் அகர்வால் கொந்தளிப்பு!

கடந்த, 13 ஆண்டுகளாக சினிமாவில் நடித்து வரும் காஜல் அகர்வாலுக்கு சில முன்னணி நடிகர்கள் சிபாரிசு செய்வதாக செய்திகள் வெளியாகியுள்ளன. ஆனால், இந்த செய்தியைக் கேட்டு கொந்தளிக்கிறார் காஜல். அதோடு, 'சினிமாவில் யாராக இருந்தாலும் திறமை இருந்தால் மட்டுமே நீடிக்க முடியும். நான் இத்தனை ஆண்டுகளாக நீடிப்பதற்கு அதுவே காரணம். எனக்கு எந்த நடிகரும் இதுவரை சிபாரிசு செய்ததில்லை...' என்று மறுக்கிறார். இருக்கிற அளவோடு இருந்தால், எல்லாம் தேடி வரும்!

— எலீசா

கதையின் நாயகியான ஆண்ட்ரியா!

'கதைக்கு அவசியப்பட்டால், நிர்வாணமாக கூட நடிப்பேன்...' என்று துணிச்சலாக ஸ்டேட்மென்ட் கொடுத்த ஆண்ட்ரியா, தற்போது, கா என்ற படத்தில் நடிக்கிறார். காட்டை மையப்படுத்தி உருவாகும் இந்த படத்தில், வன விலங்குகளின் வாழ்க்கை முறைகளை பதிவு செய்யும், 'வைல்ட் லைப் போட்டோகிராபர்' வேடத்தில் நடிக்கிறார். இதற்கா பயப்பட்டேன்; ஆனை குதிரை வந்தாலும் தாண்டுவனே!

— எலீசா

கன்னட மொழி படத்தில் சிம்பு!

காவிரி மேலாண்மை வாரியம் விவகாரத்தில், 'அரசியல்வாதிகளை ஓரம்கட்டி விட்டு, இரண்டு மாநில மக்களும் பேசினால் தான் தீர்வு கிடைக்கும்...' என்று பேசிய சிம்புவுக்கு, கர்நாடக மாநிலத்தில் ஏகப்பட்ட வரவேற்பு. இந்நிலையில், இதுவரை, தமிழ் மற்றும் தெலுங்கு படங்களில் பின்னணி பாடி வந்த சிம்பு, தற்போது, இருவுதெல்லவா பிட்டு என்ற கன்னட படத்தில், பின்னணி பாடியுள்ளார். இதையடுத்து, சிம்புவை கன்னட படத்தில் நடிக்க வைக்கவும் முயற்சி நடக்கிறது.

- சினிமா பொன்னையா

கறுப்பு பூனை!

பையா நடிகைக்கு, கோலிவுட்டில் சிபாரிசு செய்து வந்த நடிகர்கள், இப்போது வேறு நடிகைகளின் பக்கம் சாய்ந்து விட்டனர். இதனால், அந்த நடிகர்கள் மீது கோபத்தில் இருக்கும் நடிகை, அவ்வப்போது சரக்கு அடித்து விட்டு, மேற்படி நடிகர்களுக்கு போன் போட்டு சகட்டு மேனிக்கு திட்டித் தீர்த்து வருகிறார். இதனால், ராத்திரி நேரங்களில், அம்மணியின் போன் கால் வருகிறது என்றாலே மேற்படி நடிகர்கள் போனையே, சுவிட்ச் ஆப் செய்து விடுகின்றனராம்.

அட்டகத்தி நடிகையின் மார்க்கெட் குடை சாய்ந்து கிடப்பதால், மேல்தட்டு நடிகர்களுடன் குத்தாட்டம் ஆடவும் தான் தயாராக இருப்பதாக கூறி வருகிறார். அதோடு, குத்துப்பாட்டு நடிகைகளுக்கேற்ப டூ-பீஸ் கலாசாரத்தை கையில் எடுக்கவும் தான் தயாராக இருப்பதாக கூறி, கமர்ஷியல் பட இயக்குனர்களுக்கு இன்ப அதிர்ச்சி கொடுத்து வருகிறார் நடிகை.

சினி துளிகள்!

* கண்ணே கலைமானே படத்தில், அழுத்தமான ரோலில் நடிக்கிறார் தமன்னா.

* நர்மதா என்ற படத்தில், ஏழு வயது சிறுவனுக்கு அம்மாவாக நடிக்கிறார் நந்திதா.

அவ்ளோதான்!