PUBLISHED ON : ஏப் 01, 2012

கழுகுமலை!
தூத்துக்குடி மாவட்டத்தில் உள்ள பழம் பெருமை மிக்க சுற்றுலா தலம்.
மதுரை-திருநெல்வேலி தேசிய நெடுஞ்சாலையில், கோவில்பட்டியில் இருந்து, 20வது கி.மீ., தூரத்தில் உள்ளது.
இங்குள்ள மிக முக்கிய மூன்று சிறப்பம்சங்கள், அவசியம் பார்க்க வேண்டியவை. ஒற்றைக்கல்லில் செதுக்கப்பட்ட வெட்டுவான் கோவில், சமண சிற்பங்கள், தென்பழனி என்றழைக்கப் படும் கழுகாŒலமூர்த்தி குடிகொண்டுள்ள முருகனின் குடவரைக் கோவில்.
இவை ஒவ்வொன்றுமே ஒரு விதத்தில் சிறப்பாகும்.
இங்குள்ள முருகன் சன்னிதி, மேற்கு முகமாக அமைந்திருப் பதால், இத்தலம் தென்பழனி என்றே அழைக்கப்படுகிறது. கற்பாறையைக் குடைந்து, குகைக்குள் மூர்த்தி அமைந்துள்ளார். இக்கோவிலுக்கு விமானமோ, சுற்றுப்பிரகாரமோ இல்லை.
கோவிலுக்கு அருகே, குமார தெப்பம் என்ற அழகிய தெப்பம் உண்டு.
கி.பி., 768-800ல், உருவான அற்புதமான சமண சிற்பங்கள் உள்ளன.
மேலும், உலகம் முழுவதும் உள்ள பார்வையாளர்களை ஈர்ப்பது இங்குள்ள கல்வெட்டுவான் கோவில்தான்.
மலையில், மிகப்பெரிய அகண்ட பரப்பில், ஒரே கல்லில் செதுக்கப்பட்ட வெட்டுவான் கோவிலை பார்த்துக் கொண்டே இருக்கலாம். கி.பி., 8ம் நூற்றாண்டில் உருவாக்கப்பட்ட, தென் தமிழகத்தில் உள்ள ஒரே ஒற்றைக்கல் கோவில் இதுதான். முற்றுப்பெறாத சிற்பங்கள் எனினும், ஒவ்வொன்றும் அற்புதமான அழகைக் கொண்டுள்ளன. மகாபலிபுரத்தில் உள்ள ஐந்து ரத சிற்பங்களுக்கு இணையான சிற்பங்கள் இங்குள்ளவை.
இவை தவிர, சமண துறவிகளின் சிற்பங்களின் அணிவகுப்பு, உயர்ந்து நிற்கும் ஐயனார் சிலை, அம்மன் கோவில்கள், குகையில் இருக்கும் சிவன் என்று, பல விஷயங்களை பார்த்துக் கொண்டே இருக்கலாம். இப்படி பல அரிய விஷயங்களைக் கொண்ட சுற்றுலா தலம், இந்தியாவில் மட்டுமல்ல, உலகளவில் புகழப்பட வேண்டும். ஆனால், அப்படியொரு நிலை இல்லை.
காரணம், நிறையவே அடிப்படை கட்டமைப்பு வசதிகள் ஏற்பாடு செய்ய வேண்டும்.
இதன் சிறப்பு குறித்து அதிக விளம்பரம் செய்ய வேண்டும்.
கழுகுமலையை மையமாகக்கொண்டு, நம் வீட்டு குழந்தைகளுக்கு விடுதலைப் போராட்ட களத்தை சுற்றிக் காட்டலாம். காரணம், விடுதலைப் போராட்ட களத்தில், மறக்க முடியாத மாவீரரான கட்டபொம்மனின் பாஞ்சாலங்குறிச்சி கோட்டை இங்குதான் உள்ளது. பக்கத்திலேயே கட்டபொம்மன், தூக்கில் போடப்பட்ட கயத்தாறு என்ற இடம் உள்ளது. மகாகவி சுப்பிரமணியபாரதி பிறந்த எட்டயபுரம் அருகில் உள்ளது.
கழுகுமலையில், நிறைய மண்சார்ந்த கலைஞர்கள் உள்ளனர். இவர்களின் வில்லுப்பாட்டு, ஒயிலாட்டம், சிலம்பாட்டம், நையாண்டிமேளம் போன்றவை, நாடு முழுவதும் புகழ் பெற்றுள்ளது. கழுகுமலையின் சிறப்புமிக்க கடலை மிட்டாய், இனிப்பு சேவு, சில்லு கருப்பட்டி போன்றவை, மண் மணம் மாறாத சுவை கொண்டுள்ளன.
ஒடிசாவில் உள்ள கொனார்க் சூரியனார் கோவிலும், கஜுரோஹா சிற்பங்களும் ஒரு காலத்தில் புதர்மண்டி தான் கிடந்தன. அங்குள்ள பொதுமக்களிடம் முதலில் இதன் அருமை தெரியவில்லை. அதன்பிறகு ஏற்பட்ட விழிப்புணர்வு காரணமாக, இன்று தலைசிறந்த சுற்றுலா தலமாக அறிவிக்கப்பட்டு பாதுகாக்கப்பட்டு வருகிறது.
அது போல, போதுமான விழிப்புணர்வு ஏற்படுத்தப்பட்டால், கழுகுமலை மிகவும் புகழ்பெறும். தொன்மையான வரலாற்று சிறப்புமிக்க கழுகுமலையை பிரபலப்படுத்தும் முயற்சியில், மதுரை தானம் அறக்கட்டளை தீவிரமாக இறங்கியுள்ளது. அதன் ஒரு கட்டமாக, யுனெஸ்கோவின் பட்டியலில் கழுகுமலையின் பெயரை சேர்ப்பதற்கான முயற்சியில், தீவிரமாக இறங்கியுள்ளது. மேலும், கழுகுமலையிலேயே அலுவலகம் ஒன்று அமைத்து, வரக்கூடிய சுற்றுலா பயணிகளுக்கு தேவையான உதவிகளை செய்து வருகிறது. தொடர்பு எண்:9344102841/9843023404.
இந்த கோடை விடுமுறைக்கு, குழந்தைகளோடு சுற்றுலா செல்ல விரும்புபவர்களுக்கு தொன் மையும், பண்டைத் தமிழர் கலையையும், பழந்தமிழ் கலாசாரத்தையும், நாட்டின் வீரம் செறிந்த வரலாற்றையும் அறிந்து கொள்ளவும், அறிமுகப்படுத்தவும் விரும்புபவர்களுக்கு, கழுகுமலை ஒரு நல்ல தேர்வாகும்.
***
எல். முருகராஜ்
