PUBLISHED ON : ஆக 28, 2016

மரண ஜாதகம்!
* சிந்தும் மழைத்துளிக்கு தெரிவதில்லை
விழப் போவது ஆற்றிலா
இல்லை சேற்றிலா என்று...
விழுந்த பின்பே
அதன் விதி தெரிகிறது!
* ஆற்றில் விழும் துளியோ
நீராய் பெருக்கெடுத்து
அனைவரின் தேவையை தீர்க்கிறது!
* சேற்றில் விழும் துளியோ
சிதைந்து சாக்கடையாய் நாறி
சிறிதும் பயனற்று போகிறது!
* பூக்கும் மலர்களுக்கு தெரிவதில்லை
சேரப் போவது மணமாலையிலா
இல்லை மரண மாலையிலா என்று...
விற்பனை ஆகும்போது தான்
அதன் விதி தெரிகிறது!
* மணமாலையில் சேரும் மலரோ
எல்லாராலும் ஆசிர்வதிக்கப்பட்டு
மங்கல பொருளாய் மாறுகிறது!
மரண மாலையில் சேரும் மலரோ
கால்களில் மிதிபட்டு
மக்கி நாராய் போகிறது!
* பிறக்கும் பிள்ளைக்கு தெரிவதில்லை
பிற்காலத்தில் தான் தேர்ந்தெடுக்கும் பாதை
பிறர் மதிக்கும் பாதையா இல்லை
மிதிக்கும் பாதையா என்று...
வளர்ந்த பின்பே
அதன் வாழ்வின் விதி தெரிகிறது!
* மதிக்கும் பாதையில்
செல்லும் குழந்தையோ
மகத்தான சாதனைகள் புரிந்து
மாபெரும் புகழை அடைந்து
மரணித்தும் மரணிக்காமல் வாழ்கிறது!
* மிதிக்கும் பாதையில்
செல்லும் குழந்தையோ
மீளா தீமை சுழலில் சிக்கி
மிகுந்த வேதனைக்கு ஆளாகி
மெழுகில் விழுந்த புழுவாய் துடிக்கிறது!
* பிறப்பினிலே கணிக்கப்படுவதில்லை
மனித விதியின் ஜாதகங்கள்
இறப்பினிலே கணிக்கப்படுகிறது
அவனவன் வாழ்ந்த வாழ்க்கை!
— க.ஆ.தரணிசந்தர்,
சென்னை.
