கர்நாடகாவில் சில அத்தியாவசிய பொருட்களின் விலை, ஏறுமுகமாக உள்ளது. மார்க்கெட்டில் கிலோவுக்கு 45 ரூபாய் - கிலோவுக்கு 48 ரூபாய் வரை இருந்த அரிசி விலை, தற்போது, 55 ரூபாய் - 58 ரூபாய் வரை உயர்ந்துள்ளது. அதுபோல, 65 முதல், 70 ரூபாய் வரை இருந்த, உயர் ரக அரிசியின் விலை, 80 - 83 ரூபாய் வரை உயர்ந்துள்ளது.

அரிசி மட்டுமின்றி, மற்ற அத்தியாவசிய பொருட்களின் விலையும் உயர்ந்துள்ளது. கிலோவுக்கு, 43 - 45 ரூபாய் வரை இருந்த சர்க்கரை விலை, இப்போது, 46 - 47 ரூபாய் வரை அதிகரித்துள்ளது. 135 ரூபாய் - 145 ரூபாய் வரை இருந்த வேர்க்கடலை விலை, 150 - 160 ரூபாய் வரை உயர்ந்துள்ளது.

கிலோவுக்கு 110 - 120 ரூபாய் வரை இருந்த உளுந்தம் பருப்பு விலை, 146 ரூபாயாக அதிகரித்துள்ளது. சோளம் விலை கிலோவுக்கு 30 - 35 ரூபாய் வரை இருந்தது. தற்போது 60 - 65 ரூபாயாக அதிகரித்துள்ளது.

மார்க்கெட்டில் சோனா மசூரி, ஸ்ரீராம சோனா போன்ற அரிசியின் விலை, தொடர்ந்து அதிகரிக்கிறது. மழை பற்றாக்குறை இது போல நீடித்தால், உணவு தானியங்கள் விலை மேலும் அதிகரிக்கும் என, வியாபாரிகள் தெரிவித்துள்ளனர்.