ஹாசன் மாவட்ட கலெக்டர் லதாகுமாரி, நேற்று அளித்த பேட்டி:

ஹாசனாம்பா கோவில், ஆண்டுக்கு ஒரு முறை மட்டும் திறக்கப்படுகிறது. இம்முறை அக்டோபர் 29ம் தேதி முதல், நவம்பர் 11ம் தேதி வரை திறக்கப்படுகிறது. அக்டோபர் 29ம் தேதி மதியம் 12:00 மணிக்கு கோவிலின் கதவு திறக்கப்படும். அன்றைய தினம் சுத்திகரிப்பு பணிகள் நடப்பதால், பக்தர்களின் தரிசனம் செய்ய அனுமதி இருக்காது.

மறுநாள் அக்டோபர் 30ம் தேதி முதல், நவம்பர் 11ம் தேதி வரை ஹாசனாம்பாவை தரிசிக்க அனுமதி அளிக்கப்படும். நவம்பர் 11ம் தேதியன்று, சாஸ்திர, சம்பிரதாயப்படி பூஜைகள் செய்து, கர்ப்பக்கிரஹத்தின் கதவு மூடப்படும்.

மாவட்ட பொறுப்பு அமைச்சரான சிவலிங்கே கவுடா, செப்டம்பர் 26ம் தேதியன்று, ஹாசனாம்பா மஹோற்சவம் தொடர்பான போஸ்டர் வெளியிட்டு, இணையதளத்தை துவக்கி வைப்பார்.

இம்முறை ஹாசன் மாவட்டத்தின், எழு தாலுகாக்கள், வறட்சி தாலுகாக்கள் என, அறிவிக்கப்பட்டுள்ளன. வறட்சி இருந்தாலும், ஹாசனாம்பா மஹோத்சவம் எந்த குறையும் இல்லாமல் நடத்தப்படும். இதற்காக இப்போதிருந்தே, மாவட்ட நிர்வாகம் தயாராகி வருகிறது.

மஹோத்சவம் நேரத்தில், மலர் கண்காட்சி, கலை நிகழ்ச்சிகள், நாய்கள் கண்காட்சி உட்பட பல்வேறு நிகழ்ச்சிகள் நடத்த திட்டமிட்டுள்ளோம்.

இவ்வாறு அவர் கூறினார்.