ராய்ச்சூர் மாவட்டம், லிங்கசகூர் தாலுகாவில் வசிப்பவர் சித்தனகவுடா; பத்திரிகையாளர். இவரது மனைவி நாகம்மா, அரசு பள்ளியில் ஆசிரியையாக பணியாற்றுகிறார். தன் முன்னோர் மூலமாக கிடைத்த நிலத்தை விற்று, 14 லட்சம் ரூபாயை வீட்டில் சித்தனகவுடா வைத்திருந்தார். இந்த பணத்தை பிள்ளைகளின் கல்வி கட்டணம் உட்பட முக்கிய தேவைகளுக்கு பயன்படுத்த திட்டமிட்டிருந்தார்.

நேற்று முன் தினம் காலை, வழக்கம்போல பணிக்கு சென்றிருந்தனர். வீட்டில் யாரும் இல்லாததை, நோட்டமிட்ட மர்ம கும்பல், வீட்டின் பின் வாசல் கதவை உடைத்து உள்ளே புகுந்தது. பீரோவில் இருந்த 14 லட்சம் ரூபாய் ரொக்கம், கம்மல், செயின் உட்பட 95 கிராம் தங்க நகைகள், 50 கிராம் வெள்ளி பொருட்களை திருடிக்கொண்டு தப்பிச் சென்றது.

நாகம்மா பணி முடிந்து, மாலையில் வீட்டுக்கு திரும்பி வந்தபோது, பீரோவில் இருந்த சொத்து ஆவணங்கள் சிதறி கிடந்ததை பார்த்து அதிர்ச்சி அடைந்தார். பின் வாசல் கதவு உடைக்கப்பட்டிருந்தது. திருட்டு நடந்தது தெரிந்து, கணவருக்கு தகவல் கொடுத்தார். அவரும் லிங்கசகூர் போலீஸ் நிலையத்தில் புகார் அளித்தார்.

போலீசாரும் சம்பவம் நடந்த வீட்டை பார்வையிட்டனர். வழக்குப் பதிவு செய்து, திருடர்களை கண்டுபிடிக்கும் முயற்சியில் ஈடுபட்டுள்ளனர். பட்டப்பகலில் நடந்த திருட்டால், அப்பகுதியினர் பீதி அடைந்துள்ளனர்.