சிக்கபல்லாபூர் மாவட்டம், சித்லகட்டா தாலுகாவின் புருடுகுன்டே கிராமத்தில் வசித்தவர் அஞ்சினப்பா, 58. இவரது மனைவி மதுஸ்ரீ, 52. தம்பதிக்கு இரண்டு மகள்களும், ஒரு மகனும் உள்ளனர். சில ஆண்டுக்கு முன்பு, அஞ்சினப்பா இறந்துவிட்டார்.

மூத்த மகள் நாகவேணியை, சிக்கபல்லாபூரின் நாராயணபுரா கிராமத்தில் திருமணம் செய்து கொடுத்திருந்தார். இதே கிராமத்தில் மதுஸ்ரீ, தன் மகன், இளைய மகள் சாரதா, 18, ஆகியோருடன் வாடகை வீட்டில் வசித்து வந்தார்.

சாரதாவுக்கு கடுமையான வயிற்று வலி இருந்துள்ளது. பல மருத்துவமனைகளில் காண்பித்தும் குணமாகவில்லை. அவ்வப்போது ரத்த வாந்தி எடுத்தார்.

அவரை பரிசோதித்த டாக்டர்கள், எந்த பிரச்னையும் இல்லை என்றனர். ஆனால் வயிற்று வலியோ குணமாகவில்லை. யாராவது மாந்த்ரீகம் செய்திருக்கலாம் என, நினைத்து நாட்டு மருந்துகளும் கொடுத்தனர். சில நாட்களாக வயிற்று வலி இல்லை. பின் மீண்டும் வலி ஏற்பட்டுள்ளது.

சாரதா, அவ்வப்போது விசித்திரமாக நடந்து வந்தார். உரத்த குரலில் கத்துவது, மற்றவரை பார்த்து முறைப்பது உள்ளிட்ட வினோத செய்கையில் ஈடுபட்டு வந்தார்.

நேற்று முன் தினம் காலையில், மதுஸ்ரீக்கு உடல் நலம் சரியில்லாததால் மருத்துவமனைக்கு சென்றிருந்தார். திரும்பி வந்து பார்த்தபோது, சாரதா துாக்கிட்ட நிலையில் காணப்பட்டார். வயிற்று வலி தாங்காமல் தற்கொலை செய்து கொண்டதாக கூறப்பட்டாலும், மதுஸ்ரீ மறுத்துள்ளார். மகளின் நிலைக்கு பேய் காரணம் என்கிறார்.

இது குறித்து, அவர் கூறியதாவது:

என் மகளுக்கு எந்த நோயும் இல்லை. பேயின் அட்டகாசமே, அவரது இறப்புக்கு காரணம். வயிற்று வலிக்கு என்ன காரணம் என்பதை, டாக்டர்களாலும் கண்டுபிடிக்க முடியவில்லை.

கடந்த நான்கு ஆண்டுகளுக்கு முன், புருடுகுன்டே கிராமம் அருகில் உள்ள மயானம் அருகில், சாரதா நடந்து வந்தபோது, கால் தடுக்கி கீழே விழுந்தார்.

அது மூன்று பாதைகள் கூடும் இடம். அங்கு விழுந்து, எழுந்து வீட்டுக்கு வந்த பின், அவர் விசித்ரமாக நடந்து கொள்ள துவங்கினார்.

விழுந்த இடத்தில் என் மகளை, பேய் அறைந்துள்ளது. அதுவே என் மகளின் நிலைக்கு காரணம். என் மகள் விழுந்த அதே இடத்தில், நான்கைந்து பேர் விழுந்தனர். அவர்களும் இப்போது உயிரோடு இல்லை.

இவ்வாறு அவர் கூறினார்.