இந்தியாவில், அக்., முதல் செப்., வரையிலான காலகட்டம் பருத்திப் பருவமாக கணக்கிடப்படுகிறது. ஆண்டுக்கு சுமார் 300 முதல் 323 லட்சம் பேல் பருத்தி மகசூல் செய்யப்படுகிறது.

இந்தியாவின் 90 சதவீத பருத்தி அறுவடை, டிசம்பர் முதல் மார்ச் வரையிலான காலகட்டத்தில் நடைபெறுகிறது. பருத்திக்கான தேவை அதிகரிப்பதால், இறக்குமதி செய்யப்படுகிறது.

பருத்தி இறக்குமதி மீது, 11 சதவீத வரி விதிக்கப்படுகிறது. நடப்பாண்டில், முதல் தர பருத்தி மகசூல் குறைவாக இருக்கும் என எதிர்பார்க்கப்படுவதால், அதிக தேவையை கருதி, இறக்குமதி வரியை ரத்து செய்ய வேண்டும் என மறுசுழற்சி ஜவுளிக் கூட்டமைப்பு வேண்டுகோள் விடுத்து உள்ளது.

அந்த அமைப்பின் தலைவர் ஜெயபால் கூறியதாவது:

2024-25 சீசனில், முதல் தர பருத்தி விளைச்சல் பற்றாக்குறை ஏற்படும் நிலை உள்ளது. எனவே, குறைந்தபட்சம் 50 லட்சம் பேல் பருத்தி இறக்குமதி செய்யும் வகையில், அரசு தாமதமின்றி, இறக்குமதி வரியை ரத்து செய்ய வேண்டும். இதன் வாயிலாக, ஜவுளித் துறைக்கு ஊக்கமளிக்க வேண்டும்.

தற்போது நுாற்பாலைகளை விட, வர்த்தகர்கள் மற்றும் சி.சி.ஐ., நிறுவனங்களே மூன்று மடங்கு பருத்தியை வாங்கி, இருப்பு வைத்து வருகின்றன.

இதனால், கடந்த காலங்களைப் போல செயற்கை விலையேற்றம் செய்யும் சூழல் உருவாகி வருகிறது. மத்திய அரசு இதைத் தடுக்க வேண்டும்.

இவ்வாறு அவர் தெரிவித்தார்.