தலைநகர் டில்லியின் செங்கோட்டை பகுதியில், கடந்த 10ம் தேதி மாலை, கார் ஒன்று திடீரென வெடித்து சிதறியதில், 15 பேர் உயிரிழந்தனர்.

தாக்குதல் காரை ஓட்டியவர் ஜம்மு -- காஷ்மீரின் புல்வாமாவைச் சேர்ந்த டாக்டர் உமர் நபி என்பதும், தற்கொலைப் படையாக மாறி, அவர் இந்த தாக்குதலில் ஈடுபட்டதும் தெரிய வந்தது.

முன்னதாக, அதே நாள் காலையில், ஹரியானாவின் பரிதாபாதில், 3,000 கிலோ வெடி பொருட்களுடன், அங்கு செயல்படும் அல் பலாஹ் மருத்துவ பல்கலையைச் சேர்ந்த டாக்டர்கள் முஸாம்மில் கனி, அவரது தோழி ஷாஹீன் சயீத் கைதாகி இருந்தனர்.

விசாரணையில், உயிரிழந்த உமர் நபி, கைதான டாக்டர் முஸாம்மிலின் நெருங்கிய கூட்டாளி என்பது தெரிய வந்தது.

நாட்டையே உலுக்கிய இந்த பயங்கரவாத தாக்குதல் குறித்து, என்.ஐ.ஏ., எனப்படும் தேசிய புலனாய்வு அமைப்பு விசாரிக்கிறது. இது தொடர்பாக ஏழு பேர் கைது செய்யப்பட்டு உள்ளனர். இந்த சம்பவத்தில், விசாரணையின் மையப்புள்ளி யாக அல் பலாஹ் பல்கலை உள்ளது.

இந்நிலையில், கைதான பெண் டாக்டர் ஷாஹீன் சயீத்தை அல் பலாஹ் பல்கலைக்கு அழைத்துச் சென்று என்.ஐ.ஏ., அதிகாரிகள் நேற்று விசாரித்தனர்.

பல்கலையில் அவருக்கு ஒதுக்கப்பட்ட அறை எண் 22 மற்றும் அவர் பாடம் நடத்திய வகுப்பறைகளில் அதிகாரிகள் சோதனை நடத்தினர்.

அப்போது, அவருடைய அறையில் இருந்த பீரோவில் இருந்து, 18 லட்சம் ரூபாய் ரொக்கத்தை அதிகாரிகள் பறிமுதல் செய்தனர். இந்த பணம் எங்கிருந்து வந்தது என்பது குறித்து ஷாஹீன் சயீத்திடம் அதிகாரிகள் விசாரித்து வருகின்றனர்.

நடவடிக்கை அல் பலாஹ் பல்கலையில், ஜம்மு - காஷ்மீரைச் சேர்ந்த கைதான மற்றொரு டாக்டரான முஸாம்மிலை சந்தித்த ஷாஹீன் சயீத், 2023 செப்டம்பரில், அவரை இரண்டாவதாக திருமணம் செய்தார்.

ஷாஹீனை மூளைச்சலவை செய்த முஸாம்மில், பயங்கரவாத நடவடிக்கையில் ஈடுபடுத்தினார்.

அவரது அறிவுறுத்தலின்படியே, பயங்கரவாத செயலுக்கு பெண்களை சேர்க்கும் பணியில் ஷாஹீன் சயீத் தீவிரமாக ஈடுபட்டு வந்துள்ளார்.