தொடர்ந்து பல்வேறு மாறுதல்களுக்கு உள்ளாகி வரும் பணிச்சூழலில் ஏதாவது ஒரு குறிப்பிட்ட துறையில் தலைமைப் பதவிவகிப்பவரும், பள்ளி மற்றும் கல்லூரிகளில் தலைமை ஆசிரியர் பணிகளில் இருப்பவரும் காலத்துக்கேற்ற அறிவு வளர்ச்சி பெறுவது அத்தியாவசியமானதாக உள்ளது. ஆனால் வயது ஒரு தடையாக இவர்களால் மனதளவில் உணரப்படுகிறது. இந்த உணர்வு தேவையற்ற ஒன்று என்றும், இவர்களுக்கே உரிய பிரத்யேக கல்வியைத்தரவும் இந்திரா காந்தி பல்கலைக்கழகம் முன்வந்துள்ளது.

முதுநிலைப் பயிற்சியாளர் அல்லது கல்விப்பணியாளர்களாக கல்வி நிறுவனங்களில் பணியாற்றுவோர், மேலாளர்கள், உதவி மேலாளர்கள் பொது மேலாளர், விற்பனை / மார்கெட்டிங்/ ரீடெயில் மேலாளர்கள், சமூகப் பணியாளர்கள், விரிவுரையாளர்கள், கல்லூரி / பள்ளி முதல்வர்கள் ஆகிய பணிகளில் உள்ளவர்களை மையமாக வைத்து இப்பாடம் அறிமுகம் செய்யப்படுகிறது.

நேஷனல் அசெஸ்மென்ட் அண்டு அக்ரெடிஷன் கவுன்சில் வழங்கிய ஆலோசனைகளின் அடிப்படையிலேயே இப்படிப்புகள் உருவாக்கப்பட்டு வருவதாகக் கூறப்படுகிறது. தொலைநிலைக்கல்வி முறையில் இந்தியாவின் பல்வேறு பல்கலைக்கழகங்களும் வழக்கமான படிப்புகளையே தந்துவரும் நிலையில், ஒவ்வொரு துறையிலும் தேவைக்கேற்ற பல்வேறுவிதமான படிப்புகளைத் தருவதில் இக்னோ முன்னிலை வகிக்கிறது. எல்லைகளைத் தாண்டி எங்கும், எவருக்கும், பலருக்கும் கல்விதரும் இக்னோவின் பயணத்தில் இப்படிப்புகள் மற்றுமொரு மைல்கல்லாக இருக்கும் என்று அப்பல்கலைக்கழக அதிகாரபூர்வ வட்டங்கள் கருத்துத் தெரிவித்துள்ளன.