கல்வியில் சிறந்து விளங்க வேண்டும் என்றால், அதற்கு மிகப்பெரிய மாற்றங்கள் தேவையில்லை. மாறாக, தினமும் கடைபிடிக்கும் சில சிறிய பழக்கங்களே, காலப்போக்கில் மிகப்பெரிய வெற்றியைத் தேடித்தரும்.

நேரத்தை நிர்வகித்தல்

வெற்றி பெற்ற ஒவ்வொரு மாணவரிடமும் இருக்கும் மிக முக்கியமான திறமை 'நேர மேலாண்மை'. இதற்கு ஒவ்வொரு நிமிடத்தையும் கணக்கிட்டு வாழ வேண்டும் என்று அர்த்தமல்ல. மாறாக, படிப்பதற்கும், விளையாடுவதற்கும், ஓய்வெடுப்பதற்கும் சரியான நேரத்தை ஒதுக்க வேண்டும்.

ஒரு நாட்குறிப்பை பயன்படுத்தி, வீட்டுப்பாடங்கள் மற்றும் தேர்வுத் தேதிகளை குறித்து வைத்துக் கொள்வது நல்லது. பெரிய பணிகளைச் சிறிய பகுதிகளாகப் பிரித்துச் செய்வது மூலம் கடைசி நேர பதற்றத்தைத் தவிர்க்கலாம்.

நேர்மறையான சிந்தனை

"என்னால் முடியும்" என்ற நம்பிக்கை தான் வெற்றியின் முதல் படி. படிப்பு கடினமாகத் தோன்றும் போது சோர்வடையாமல், நேர்மறையான எண்ணங்களை வளர்த்துக் கொள்ள வேண்டும்.

தோல்விகளைக் கண்டு துவளாமல், அவற்றை ஒரு பாடமாக எடுத்துக் கொண்டு முன்னேற வேண்டும். மேலும், தன்னம்பிக்கை தரும் வார்த்தைகளைத் தங்களுக்குள் சொல்லிக் கொள்வது மன உறுதியை அதிகரிக்கும்.

சுறுசுறுப்பாக இருத்தல்

உடல் நலமாக உள்ளவரைத் தான், மூளை சிறப்பாகச் செயல்படும். தினமும் சிறிது நேரமாவது உடற்பயிற்சி செய்வது அவசியம். நடைப்பயிற்சி, சைக்கிள் ஓட்டுதல் அல்லது பிடித்த விளையாட்டை விளையாடுவது போன்றவை உடலுக்கு ஆற்றலைத் தரும். இது மன அழுத்தத்தைக் குறைத்து, படிப்பில் கவனத்தைச் செலுத்த உதவும்.

தெளிவான இலக்குகளை அமைத்தல்

இலக்கு இல்லாத பயணம் வெற்றி அடையாது. "நான் நன்றாகப் படிப்பேன்" என சொல்வதை விட, "என்ன செய்யப் போகிறேன்?" என்ற தெளிவான மற்றும் எட்டக்கூடிய சிறிய இலக்குகளை நிர்ணயிக்க வேண்டும். இது உங்கள் முன்னேற்றத்தைக் கண்காணிக்கவும், தன்னம்பிக்கையை வளர்க்கவும் உதவும்.

திரை நேரத்தைக் குறைத்தல்

மொபைல் போன் மற்றும் கணினித் திரையில் அதிக நேரம் செலவிடுவது கவனத்தைச் சிதறடித்து, தூக்கத்தைக் கெடுக்கும். படிக்கும் நேரத்திலும், சாப்பிடும் நேரத்திலும் மொபைல் போனைத் தவிர்ப்பது நல்லது. இது குடும்பத்தினர் மற்றும் நண்பர்களுடன் நேரத்தைச் செலவிடவும், மனதை ஒருமுகப்படுத்தவும் உதவும்.

மனநலம்

உடல் ஆரோக்கியத்தைப் போலவே மன ஆரோக்கியமும் முக்கியம். தியானம் செய்வது, பிடித்த புத்தகங்களைப் படிப்பது அல்லது அமைதியாக அமர்ந்திருப்பது மனப்பதற்றத்தைக் குறைக்கும்.

நல்ல உறக்கம்

மாணவர்களுக்கு 8 முதல் 10 மணி நேரத் தூக்கம் மிக அவசியம். நல்ல தூக்கம் தான் மூளையின் செயல்பாட்டைச் சீராக்கும். இரவில் வெகு நேரம் விழித்திருப்பதைத் தவிர்த்து, குறிப்பிட்ட நேரத்தில் தூங்கச் செல்வது ஞாபக சக்தியை அதிகரிக்கும் மற்றும் அடுத்த நாள் முழுவதும் சுறுசுறுப்பாக இருக்க உதவும்.

வெற்றி என்பது உடனே கிடைப்பதில்லை. ஆனால், சிறிய சிறிய தொடக்கங்களே, எதிர்காலத்தில் பெரிய மாற்றங்களை உருவாக்கும். சிறிய பழக்கங்களை உருவாக்கி அவற்றை கடைபிடிப்பதன் மூலம் படிப்பில் மட்டுமல்லாமல் வாழ்க்கையிலும் பெரிய மாற்றங்களை உணர முடியும்.