கவுன்சிலிங்கில் அரசு ஒதுக்கீட்டுக்கான எம்.சி.ஏ., எம்.பி.ஏ., படிப்பை தேர்வு செய்த மாணவர்கள், தேர்வு செய்த கல்லூரியில் ஆக., 20ம் தேதிக்குள் கல்வி கட்டணத்தை செலுத்த வேண்டும் என, தொழில்நுட்ப கல்வித்துறை மற்றும் கல்லூரி கல்வி இயக்ககம் தெரிவித்தன.

இதையடுத்து, ஏராளமான மாணவர்கள், முதலாமாண்டு கட்டணத்தை செலுத்தினர். ஆனால், சில மாணவர்களுக்கு வங்கிகளிடம் இருந்து கல்விக்கடன் கிடைக்காததால், கட்டணத்தை இன்னும் செலுத்தவில்லை.

அரசு ஒதுக்கீட்டுக்கான இடங்கள் பல கல்லூரிகளில் நிரப்பப்படவில்லை. அந்த காலியிடங்களை, நிர்வாக ஒதுக்கீட்டில் நிரப்ப, பல கல்லூரிகள் முக்கியத்துவம் கொடுத்து வருகின்றன. இதை கருத்தில் கொண்டு, தொழில்நுட்ப கல்வித்துறை மற்றும் கல்லூரி கல்வி இயக்ககம், கல்லூரிகளில் அரசு ஒதுக்கீட்டுக்கான காலியிடங்களை வரும் 31ம் தேதி வரை, கல்லூரி நிர்வாகம் நிரப்பக் கூடாது என உத்தரவிட்டுள்ளது.

தொழில்நுட்ப கல்வித்துறை, அனைத்து சுயநிதி இன்ஜினியரிங் கல்லூரி முதல்வர்களுக்கும் கடந்த 14ம் தேதி கடிதம் (எண்: 2910) அனுப்பியுள்ளது. அக்கடிதத்தில், அரசு ஒதுக்கீட்டில் உள்ள எம்.பி.ஏ., எம்.சி.ஏ., காலியிடங்களை, கல்லூரி நிர்வாகம் ஆக., 31ம் தேதி வரை நிரப்பக் கூடாது என, குறிப்பிடப்பட்டுள்ளது.

இதே போல், கல்லூரி கல்வி இணை இயக்குனர் நளினி ரவீந்திரன், அனைத்து கல்லூரி செயலர் மற்றும் முதல்வர்களுக்கு அனுப்பியுள்ள சுற்றறிக்கையில், அரசு ஒதுக்கீட்டில் உள்ள எம்.பி.ஏ., எம்.சி.ஏ., காலியிடங்களை, கல்லூரி நிர்வாகம் வரும் 31ம் தேதி வரை நிரப்பக் கூடாது என கூறியுள்ளார்.