மருத்துவம், பொறியியல், கணினி அறிவியல் போன்ற வழக்கமான படிப்புகளைத் தாண்டியும் இன்று மாணவர்களுக்கு ஏராளமான கல்வி வாய்ப்புகள் உள்ளன. அவற்றில் படைப்பாற்றலையும் தொழில்நுட்பத்தையும் இணைக்கும் துறைகளுக்கு முக்கியத்துவம் அதிகரித்து வருகிறது. அவற்றில் ஒன்று விஷுவல் கம்யூனிகேஷன்.

ஒரு கருத்தை ஆயிரம் வார்த்தைகளில் சொல்வதைவிட, ஒரு நல்ல படம் சில நொடிகளில் சொல்லிவிடலாம். புகைப்படம், காணொளி, வரைகலை, அசைவூட்டம், திரைப்படம், விளம்பரம், இணையதள வடிவமைப்பு போன்றவற்றின் மூலம் கருத்துகளை மக்களிடம் கொண்டு சேர்ப்பதே விஷுவல் கம்யூனிகேஷனின் அடிப்படை. கலை ஆர்வத்துடன் தொழில்நுட்பத்திலும் ஆர்வம் உள்ள மாணவர்களுக்கு இது ஒரு சுவாரசியமான துறையாக இருக்கலாம்.

இதுபோல அனிமேஷன், திரைப்படத் தயாரிப்பு, புகைப்படக் கலை, விளையாட்டு வடிவமைப்பு, பயனர் அனுபவ வடிவமைப்பு (UX), பயனர் இடைமுக வடிவமைப்பு (UI), ஊடகப் படிப்பு, விளம்பரத் தொடர்பியல் போன்ற துறைகளும் வளர்ந்து வருகின்றன. இத்துறைகளில் கற்பனை மட்டும் போதாது; தொழில்நுட்ப அறிவு, தகவல் தொடர்புத் திறன், குழுவாகச் செயல்படும் திறன் ஆகியவையும் தேவை.

உதாரணமாக, ஒரு விளையாட்டை உருவாக்கும் குழுவில் நிரலாளர் மட்டும் இருப்பதில்லை. கதையை உருவாக்குபவர், கதாபாத்திரங்களை வடிவமைப்பவர், காட்சிகளை உருவாக்குபவர், ஒலி அமைப்பவர், விளையாட்டின் பயன்பாட்டு முறையை வடிவமைப்பவர் எனப் பல்வேறு திறன்களைக் கொண்டவர்கள் இணைந்து பணியாற்றுகிறார்கள். இதனால் ஒரே துறைக்குள் பலவிதமான தொழில் வாய்ப்புகளும் உருவாகின்றன.

இந்தப் படிப்புகளைத் தேர்வு செய்யும் மாணவர்கள், “இதில் வேலை கிடைக்குமா?” என்பதோடு “என்னுடைய திறமை இதில் எங்கு பொருந்துகிறது?” என்றும் சிந்திக்கலாம். வரைவதில் ஆர்வமா? புகைப்படத்தில் ஆர்வமா? கதைகளை உருவாக்குவதிலா? தொழில்நுட்பத்தைப் பயன்படுத்துவதிலா? மனிதர்கள் எப்படி ஒரு செயலியைப் பயன்படுத்துகிறார்கள் என்பதில் ஆர்வமா? ஒவ்வொரு ஆர்வத்துக்கும் ஒரு கல்விப் பாதை இருக்கக்கூடும்.

எனவே, உயர்கல்வி என்றால் குறிப்பிட்ட சில படிப்புகள் மட்டுமே என்ற எண்ணம் மாற வேண்டும். மாணவனின் ஆர்வம், திறமை, படைப்பாற்றல் ஆகியவற்றுக்குப் பொருத்தமான புதிய துறைகளை அறிந்து கொள்வதும் கல்வியின் முக்கியப் பகுதிதான். நாளைய வேலை உலகம் பல புதிய வாய்ப்புகளைத் திறக்கும் நிலையில், அந்த வாய்ப்புகளைக் கண்டுபிடிப்பதற்கான முதல் படி - தன்னுடைய ஆர்வத்தைத் தெரிந்துகொள்வது.

எங்கே படிக்கலாம்?


விஷுவல் கம்யூனிகேஷன், அனிமேஷன், திரைப்படம், புகைப்படம், விளம்பரம், ஊடகம், வடிவமைப்பு போன்ற துறைகளில் பல்வேறு கல்வி நிறுவனங்களில் படிப்புகள் உள்ளன. பொதுவாக பிளஸ் 2 முடித்த பிறகு இளநிலைப் படிப்புகளில் சேரலாம். சில படிப்புகளுக்கு நுழைவுத்தேர்வு அல்லது திறனறியும் தேர்வும் இருக்கலாம். தமிழ்நாட்டில் சென்னை உள்ளிட்ட நகரங்களில் பல கல்லூரிகள் விஷுவல் கம்யூனிகேஷன் மற்றும் ஊடகத் தொடர்பியல் சார்ந்த படிப்புகளை வழங்குகின்றன.

பல்கலைக்கழகங்கள் மற்றும் தனியார் கல்வி நிறுவனங்களிலும் அனிமேஷன், திரைப்படத் தயாரிப்பு, வடிவமைப்பு போன்ற துறைகளில் தனிப்பட்ட படிப்புகள் கிடைக்கின்றன. தேசிய அளவில் வடிவமைப்பு, திரைப்படம், ஊடகம் போன்ற துறைகளுக்கென சிறப்பு நிறுவனங்களும் உள்ளன. உதாரணமாக, National Institute of Design வடிவமைப்புத் துறையில் பல்வேறு படிப்புகளை வழங்குகிறது.

திரைப்படத் துறையில் ஆர்வமுள்ளவர்கள் Film and Television Institute of India போன்ற நிறுவனங்களையும் கவனிக்கலாம். ஆனால் கல்வி நிறுவனத்தைத் தேர்வு செய்வதற்கு முன், படிப்பின் பாடத்திட்டம், அங்கீகாரம், பயிற்சி வசதிகள், ஆய்வகங்கள், தொழில்துறைப் பயிற்சி, மாணவர் உருவாக்கிய பணிகளுக்கான வாய்ப்புகள் ஆகியவற்றைப் பார்த்துத் தேர்வு செய்வது முக்கியம். “பெயர் பெற்ற கல்லுாரி” என்பதைக் காட்டிலும், மாணவன் விரும்பும் துறையில் நடைமுறை அனுபவம் கிடைக்கிறதா என்பதும் கவனிக்க வேண்டிய விஷயம்.