UPDATED : ஜூன் 24, 2014 12:00 AM
ADDED : ஜூன் 24, 2014 05:33 PM
மதுரை: மதுரையில் நடந்து வரும் பொது மாறுதல் கவுன்சிலிங்கில், காலி பணியிடங்களை மறைத்ததாக கூறி, போராட்டத்தில் ஈடுபட்ட ஆசிரியர்கள், அதிகாரிகளின் சமாதானத்திற்கு பின், பங்கேற்றனர்.
முதுநிலை பட்டதாரி ஆசிரியர்களுக்கு, மாவட்டத்திற்குள் பணி மாறுதலுக்கான கவுன்சிலிங் நடந்தது. இதற்காக, காலை 10 மணிக்கு, ஆசிரியர்கள், இளங்கோ மாநகராட்சி பள்ளி மையத்தில் திரண்டனர். மாநில அளவில் ஆன்லைனில் ஏற்பட்ட தாமதம் காரணமாக, காலை 12:40 மணிக்கு கவுன்சிலிங் துவங்கியது. அப்போது மாவட்டத்தில் 17 காலி பணியிடங்கள் மட்டும் இருப்பதாக நோட்டீஸ் ஒட்டப்பட்டது.
பல காலி பணியிடங்கள் மறைக்கப்பட்டுள்ளதாக கூறி, முதுநிலை பட்டதாரி ஆசிரியர் சங்க நிர்வாகிகள் பிரபாகரன், சரவணமுருகன், சந்திரன் தலைமையில் ஆசிரியர்கள் ஆர்ப்பாட்டத்தில் ஈடுபட்டனர். பின், கவுன்சிலிங்கை புறக்கணிப்பதாக அறிவித்தனர். அவர்கள் கூறுகையில், "மதுரையில் 52 காலியிடங்கள் உள்ளன. கவுன்சிலிங்கில் 17 இடங்கள் மட்டும் காண்பிக்கப்பட்டன. ஒவ்வொரு ஆண்டும் இதுபோல் இடங்கள் மறைக்கப்பட்டு பல லட்சம் ரூபாய்க்கு விலை பேசப்படுகிறது" என்றனர்.
முதன்மை கல்வி அலுவலர் ஆஞ்சலோ இருதயசாமி, சங்க நிர்வாகிகளிடம், "தற்போது காண்பிக்கப்பட்ட காலி பணியிடங்களை முதலில் தேர்வு செய்யுங்கள். மறைக்கப்பட்ட பணியிடங்கள் குறித்து கல்வி அதிகாரிகளிடம் பின் பேச்சுவார்த்தை நடத்துங்கள்," என்றார். ஒரு மணி நேரத்திற்கு பின், துவங்கிய கவுன்சிலிங்கில் 17 இடங்களையும் ஆசிரியர்கள் தேர்வு செய்தனர்.
தர்ணா
தொடக்கப் பள்ளி தலைமையாசிரியர்களுக்கான ஒன்றியம் விட்டு ஒன்றியம் மாறுதல் கவுன்சிலிங், மாவட்ட தொடக்கக் கல்வி அலுவலர் சுப்பிரமணியன் தலைமையில் நடந்தது. டி.வள்ளாளபட்டி, மாணிக்கம்பட்டி உட்பட பல இடங்களில் பணியிடங்கள் மறைக்கப்பட்டதாக சர்ச்சை எழுந்தது.
ஆசிரியர்கள் தர்ணா நடத்த முடிவு செய்தனர். பின், அவர்களிடம் பேச்சுவார்த்தை நடத்தி, சம்பந்தப்பட்ட இடங்கள் காண்பிக்கப்பட்டு கவுன்சிலிங் நடந்தது. சஸ்பெண்ட் செய்யப்பட்ட கீரனூர் பள்ளி தலைமையாசிரியர் பணியிடத்திற்கும் மாறுதல் உத்தரவு வழங்கப்பட்டதால் சர்ச்சை எழுந்தது.
