புத்தகத்துக்கு தடை எதிர்த்த மனு; உத்தரவை தள்ளிவைத்த ஐகோர்ட்
புத்தகத்துக்கு தடை எதிர்த்த மனு; உத்தரவை தள்ளிவைத்த ஐகோர்ட்
UPDATED : நவ 23, 2023 12:00 AM
ADDED : நவ 23, 2023 02:27 PM
தமிழக அரசு, மதுரை வீரன் உண்மை வரலாறு என்ற புத்தகத்துக்கு தடை விதித்து, பறிமுதல் செய்ய, 2015ல் உத்தரவிட்டது. இதை எதிர்த்து, நுால் ஆசிரியர் குழந்தை ராயப்பன், உயர் நீதிமன்றத்தில் மனுத் தாக்கல் செய்திருந்தார். புத்தகத்தில், ஜாதி ரீதியாக எதுவும் இல்லை எனவும் தடையை நீக்கவும் கோரியிருந்தார்.இந்த வழக்கு, நீதிபதிகள் டி.கிருஷ்ணகுமார், சி.வி.கார்த்திகேயன், தனபால் அடங்கிய அமர்வில் விசாரணைக்கு வந்தது. அரசு தரப்பில், புத்தகத்துக்கு தடை செய்ததை எதிர்த்து, 2 மாதங்களுக்குள் உயர் நீதிமன்றத்தில் மனு தாக்கல் செய்ய வேண்டும் என்றும் ரிட் வழக்காக தாக்கல் செய்ய முடியாது என்றும் தெரிவிக்கப்பட்டது.அதைத்தொடர்ந்து, ரிட் வழக்காக தாக்கல் செய்த இந்த மனு, விசாரணைக்கு ஏற்புடையதா என்பது குறித்து விளக்கம் அளிக்க, நீதிபதிகள் உத்தரவிட்டிருந்தனர். வழக்கு நேற்று விசாரணைக்கு வந்த போது, தடை விதிப்பதற்கு முன், தங்கள் தரப்பை கேட்காததால், இயற்கை நீதி மீறப்பட்டுள்ளது. அரசின் தடை உத்தரவு, அடிப்படை உரிமையான கருத்து சுதந்திரத்துக்கு விரோதமாக உள்ளது. மனு, விசாரணைக்கு ஏற்புடையது தான் என, மனுதாரர் தரப்பில் தெரிவிக்கப்பட்டது.இதையடுத்து, இவ்வழக்கின் மீதான உத்தரவை, நீதிபதிகள் தள்ளி வைத்தனர்.
