நியூயார்க்:
அமெரிக்காவின் மாசாசூசெட்ஸ் மாகாணத்தில் ஹார்வர்டு பல்கலை உள்ளது. அமெரிக்க அதிபர் டிரம்பின் நிர்வாகம் இந்த பல்கலையில் உள்ள சமத்துவம் மற்றும் பன்முக திட்டங்களை நிறுத்தும்படியும், பேராசிரியர்களுக்கான அதிகாரத்தை குறைக்கவும் வழிகாட்டுதல்களை பிறப்பித்தது.

இதை பல்கலை ஏற்க மறுத்ததால், ஹார்வர்டு பல்கலைக்கு வழங்கப்பட்டு வந்த, 18,500 கோடி ரூபாய் நிதியுதவியை டிரம்ப் நிறுத்தினார்.

இந்நிலையில், அமெரிக்க உள்துறை அமைச்சர் கிறிஸ்டி நோயம் ஹார்வர்டு பல்கலையில் படிக்கும் வெளிநாட்டு மாணவர்களின் சட்டவிரோத மற்றும் வன்முறை செயல்பாடுகள் குறித்த விபரங்களை வரும் 30ம் தேதிக்குள் அறிக்கையாக சமர்ப்பிக்க பல்கலை நிர்வாகத்திற்கு கடிதம் எழுதியுள்ளார்.

மீறினால் வெளிநாட்டு மாணவர் சேர்க்கைக்கான தகுதியை ஹார்வர்டு பல்கலை இழக்கும் என்றும் அதில் எச்சரித்துள்ளார்.