போலி மருந்து விவகாரம் தொடர்பாக பிரபல 'சன் பார்மா' நிறுவனம் அளித்த புகாரின் பேரில் சி.பி.சி.ஐ.டி, போலீசார் வழக்கு பதிந்து இருவரை கைது செய்தனர்.

விசாரணையில், புதுச்சேரியில் பிரபல மருந்து நிறுவனங்களின் விநியோகஸ்தரான மதுரையை சேர்ந்த ராஜா என்பவர், போலி மருந்துகளை தயாரித்து தனது ஏஜென்சி மூலமே மருந்துகளை விற்பனை செய்து வந்தது தெரியவந்தது.

இதற்காக, புதுச்சேரியில் பல இடங்களில் போலி மருந்துகள் தயாரித்து வந்தது தெரிய வந்தது. அதன்பேரில், குருமாம்பேட்டை மற்றும் மேட்டுப்பாளையம் தொழிற்பேட்டையில் மூன்று குடோன்களில் சோதனை நடத்தி, ரூ.40 கோடி மதிப்பு மருந்து உள்ளிட்ட பொருட்களை பறிமுதல் செய்து, மூன்று குடோன்களுக்கும் 'சீல்' வைத்தனர்.

அதனைத் தொடர்ந்த திருபுவனை பாளையத்தில் உள்ள பூட்டி கிடந்த 'லார்வன் பார்மாசெட்டிக்கல்ஸ்' கம்பெனி பூட்டை உடைத்து சி.பி.சி.ஐ.டி., போலீசார் மற்றும் மருத்து தரக் கட்டுப்பாட்டு அதிகாரிகள் நேற்று முன்தினம் முதல் நேற்று மாலை வரை சோதனை நடத்தினர். அதில், இந்த கம்பெனியை, ராஜா ரூ.450 கோடிக்கு விலைக்கு வாங்கி உரிமத்தை புதுப்பிக்கவில்லை. அதனால், மருந்து தயாரிக்க கடந்த 2024ம் ஆண்டே அரசு தடை விதித்துள்ளது. அதனை மீறி, ராஜா தொடர்ந்து போலி மருந்துகளை தயாரித்து வந்து தெரியவந்தது.

அதனைத் தொடர்ந்த அந்த கம்பெனியில் இருந்த மருந்துகள், மூலப் பொருட்கள், இயந்திரங்கள் என அனைத்தையும் பறிமுதல் செய்து நேற்று மாலை நீதிமன்ற உத்தரவை பெற்று 'சீல்' வைத்தனர்.

இந்த மோசடி தொடர்பாக மேலும் 6 குடோன்களில் சோதனை நடத்த வேண்டியுள்ளது குறிப்பிடத்தக்கது.