வங்கக் கடலில் இலங்கை அருகே நிலவிய 'டிட்வா' புயல் மணிக்கு 10 கி.மீ., வேகத்தில், வடக்கு மற்றும் வடமேற்கு திசையில் நடந்து நேற்று மாலை 6 மணிக்கு தமிழக பகுதியான வேதாரண்யம் அருகே நிலை கொண்டது.

புயல், வங்க கடல் கரையை நெருங்கியதை தொடர்ந்து நேற்று முன்தினம் இரவு முதலே புதுச்சேரியில் மழை பெய்ய துவங்கியது. அதில் நேற்று காலை வரை 1 செ.மீ., அளவிற்கு மழை பதிவாகியது.

பாகூரில் அதிக மழை இந்நிலையில் நேற்று காலை 8:30 மணி முதல் மழை தொடர்ந்து பெய்து வந்த நிலையில், மதியம் 2 மணிக்கு பின் தீவிர மடைந்தது. இதனால், நேற்றுகாலை 8:30 மணி முதல் மாலை 5 மணிவரை புதுச்சேரியில் 4.1 செ.மீ., அளவிற்கும், பாகூரில் 5.5 செ.மீ., அளவிற்கும் மழை பதிவாகியது. தொடர் மழையால், தாழ்வான பகுதிக ளில் மழைநீர் தேங்கியது.

கடல் சீற்றம் கடல் சீற்றமாக காணப்பட்டது. 10 முதல் 15 அடி உயரத்திற்கு ராட்சத அலைகள் ஆர்ப்பரித்தன. கடல் சீற்றத்தை காண போலீஸ் தடையை மீறி ஏராளமான இளைஞர்கள் கடற்கரையில் கூடியிருந்தனர். அவர்களை போலீசார் எச்சரித்து அனுப்பினர்.

இரவு பணி ரத்து நேற்று இரவு மழை தீவிர மடையும் என வானிலை ஆய்வு மையம் எச்சரித்துள்ளதை தொடர்ந்து புதுச்சேரியில் உள்ள அனைத்து தொழிற்சாலைகளிலும் இரவு பணியை ரத்து செய்து கலெக்டர் உத்தரவிட்டார்.

வெறிச்சோடிய சாலைகள் நேற்று காலை முதல் தொடர்ந்து மழை பெய்தபடி இருந்ததால், புதுச் சேரியில் எப்பொழுதும் பரபரப்பாக காணப்படும் நேரு வீதி, அண்ணா சாலை, மறைமலையடிகள் சாலை, இந்திரா சதுக்கம், காமராஜர் சாலை உள்ளிட்ட அனைத்து சாலைகளும் மக்கள் நடமாட்டமின்றி வெறிச்சோடி காணப்பட்டன. அலுவலக நேரமான காலை 8 மணி முதல் 10 மணி வரையிலும், மாலை 4 மணி முதல் 6.30 மணிவரையில் மட்டும், தொடர் மழையிலும் சாலைகளில் மக்கள் கூட்டம் சற்று காணப்பட்டது.

பூங்கா மூடல் தொடர் மழை காரணமாக, சுற்றுலா மையாங்களான தாவரவியல் பூங்கா மற்றும் நோணாங்குப்பம் படகு குழாம் பாதுகாப்பு கருதி நேற்றும், இன்றும் மூட உத்தரவிடப்பட்டுள்ளது.

மதுக்கடைகள் மூடல் இரவு கனமழை நீடிக்கும் என வானிலை ஆய்வு மைய அறிவிப்பை தொடர்ந்து, மாவட்டத்தில் உள்ள அனைத்து அனைத்து வகை மதுக்கடைகள், பார்கள் மற்றும் சாராயக் கடைகள் இரவு 8 மணிக்கு மூட கலெக்டர் உத்தரவிட்டார்.