சுல்தான்பேட்டையை சேர்ந்தவர் முகமது அன்சாரி மகன் முகமது தவ்பீக், 27; கால்நடை மருத்துவர். இவர், கடந்த மூன்றரை ஆண்டுகளாக அரும்பார்த்தபுரம் வில்லியனுார் மெயின் ரோட்டில் உள்ள தனியார் கால்நடை மருத்துவமனையில் பணிபுரிந்து வந்தார்.

கடந்த 5ம் தேதி இரவு 11:00 மணியளவில், கண்டமங்கலம் பகுதியை சேர்ந்த வெங்கடராமன், வினித்குமார், விஜய், சதீஷ் ஆகியோர் தங்களது நாயை பாம்பு கடித்துவிட்டதாக சிகிச்சைக்கு கொண்டு வந்தனர். முகமது தவ்பீக் நாயின் ரத்த மாதிரியை பரிசோதனை செய்து, பாம்பு கடிக்கவில்லை. உண்ணி காய்ச்சல் தான் என்றும் காலையில் சிகிச்சைக்கு நாயை அழைத்து வருமாறு கூறியுள்ளார்.

இதனால் ஆத்திரமடைந்த நான்கு பேரும் முகமது தவ்பீக்கை ஆபாசமாக திட்டி மிரட்டல் விடுத்தனர். இது குறித்து முகமது தவ்பீக் புகாரின் பேரில், வெங்கடராமன் உட்பட நான்கு பேர் மீது, ரெட்டியார்பாளையம் போலீசார் வழக்குப் பதிந்து விசாரித்து வருகின்றனர்.