அசாமின் கவுகாத்தியில் 'சூப்பர் 100' அந்தஸ்து பெற்ற மாஸ்டர்ஸ் பாட்மின்டன் தொடர் நடக்கிறது. இதன் ஆண்கள் ஒற்றையர் பிரிவு 2வது சுற்றில் இந்தியாவின் சதிஷ் குமார் கருணாகரன், மலேசியாவின் ஷோலே அடில் மோதினர். அபாரமாக ஆடிய சதிஷ் குமார் 21-19, 9-21, 21-7 என்ற கணக்கில் வெற்றி பெற்று காலிறுதிக்கு முன்னேறினார்.

மற்றொரு போட்டியில் இந்தியாவின் ஆயுஷ் ஷெட்டி 19-21, 22-20, 23-21 என சகவீரர் சங்கர் முத்துசாமியை தோற்கடித்து காலிறுதிக்குள் நுழைந்தார். இந்தியாவின் தருண் 24-22, 15-21, 21-13 என சகவீரர் பிரியான்ஷு ரஜாவத்தை வென்றார்.

பெண்கள் ஒற்றையர் பிரிவு 2வது சுற்றில் இந்தியாவின் தன்வி சர்மா, சீனதைபேயின் யி என் ஹசிக் மோதினர். இதில் தன்வி சர்மா 21-19, 21-8 என்ற நேர் செட் கணக்கில் வெற்றி பெற்று காலிறுதிக்கு முன்னேறினார். மற்றொரு போட்டியில் இந்தியாவின் மான்சி சிங் 17-21, 21-13, 21-9 என சீனதைபேயின் சென் சு யுவை வென்றார். இந்தியாவின் அன்மோல் கார்ப் 21-9, 21-15 என சகவீராங்கனை தாரா ஷாவை வீழ்த்தினார். இந்தியாவின் தஸ்னிம் மிர் 11-21, 21-18, 24-26 என தாய்லாந்தின் லாலின்ரட் சைவானிடம் தோல்வியடைந்தார்.

கலப்பு இரட்டையர் 2வது சுற்றில் இந்தியாவின் துருவ் கபிலா, தனிஷா கிராஸ்டோ ஜோடி 15-21, 21-10, 21-11 என சகநாட்டை சேர்ந்த ஆயுஷ் அகர்வால், ஸ்ருதி மிஷ்ரா ஜோடியை வீழ்த்தியது.