சீனாவில், 'சூப்பர் 1000' அந்தஸ்து பெற்ற சர்வதேச பாட்மின்டன் தொடர் நடக்கிறது. இதன் பெண்கள் ஒற்றையர் பிரிவு முதல் சுற்றில் இந்தியாவின் மாளவிகா பன்சோத் ('நம்பர்-43'), பாரிஸ் ஒலிம்பிக்கில் வெண்கலம் வென்ற இந்தோனேஷியாவின் கிரிகோரியா மரிஸ்கா துஞ்சங் ('நம்பர்-7') மோதினர். முதல் செட்டை 26-24 என போராடி கைப்பற்றிய மாளவிகா, இரண்டாவது செட்டை 21-19 என வென்றார். மொத்தம் 46 நிமிடம் நீடித்த போட்டியில் அசத்திய மாளவிகா 26-24, 21-19 என்ற நேர் செட் கணக்கில் வெற்றி பெற்று 2வது சுற்றுக்குள் நுழைந்தார்.

பெண்கள் ஒற்றையரில் நடந்த மற்ற முதல் சுற்றுப் போட்டிகளில் இந்தியாவின் ஆகர்ஷி காஷ்யப், இமாத் பரூக்கி சமியா தோல்வியடைந்தனர். ஆண்கள் ஒற்றையர் முதல் சுற்றில் இந்தியாவின் கிரண் ஜார்ஜ் 21-4, 10-21, 21-23 என ஜப்பானின் கென்டா நிஷிமோடோவிடம் போராடி தோல்வியடைந்தார்.

பெண்கள் இரட்டையரில் இந்தியாவின் திரீசா-காயத்ரி கோபிசந்த், ருதபர்னா-ஸ்வேதபர்னா, கலப்பு இரட்டையரில் சுமீத்-சிக்கி ரெட்டி, சதிஷ் குமார்-ஆத்யா ஜோடி தோல்வியை தழுவின.